Prezidente Asosiasaun Jornalista Timor Lorosa’e (AJTL), Zevonia Vieira (klaran) hala’o konférensia impresa kona-ba loron importante Liberdade Imprensa ho tema ",Informasaun nu'udar Bem Publiku" iha sede AJTL Fatuhada. segunda (03/05). Imajen TATOLI/Egas Cristóvão.

DILI, 03 maiu 2021 (TATOLI)–Iha komemorasaun Loron Mundiál Liberdade Imprensa (World Press Freedom Day) ho tema “Information as a Public Good” ne’e, Asosiasaun Jornalista Timor Lorosa’e (AJTL) husu ba jornalista sira-ne’ebé hala’o atividade jornalizmu hodi hato’o (públika) informasaun ne’ebé loloos, kompletu no kredivel hodi kontribui ba públiku nia di’ak liuliu iha ámbitu propagasaun COVID-19.

Notísia Relevante: CI husu MAPKOMS promove ba instituisaun seluk atu utiliza direitu resposta

Prezidente AJTL, Zevonia Veira, hateten jornalista no mídia iha responsabilidade morál atu prodús no hato’o notisia sira-ne’ebé tenke reflete ba tema jerál loron mundiál liberdade imprensa tinan ne’e, atu ajuda sidadaun sira hodi halo prevensaun ba COVID-19 tanba Timor-Leste dadauk ne’e tama ona iha faze transmisaun komunitária.

“Bazea ba observasaun AJTL nian relasiona ho tranzmisaun lokál COVID-19 nian iha territóriu-laran, publikasaun notísia hosi kanál mídia balu la ajuda fasilita sidadaun sira atu hetan informasaun loloos no edukativu hodi halo prevensaun ba COVID-19. Maibé notisia hirak ne’e halo públiku atu la fiar ezisténsia ka propagasaun virus ne’e iha rai-laran. AJTL husu ba jornalista sira-ne’ebé hala’o atividade jornalizmu hodi hato’o (públika) informasaun ne’ebé loloos, kompletu no kredivel ba ba públiku,” Prezidente AJTL haktuir iha konferénsia imprensa ne’ebé realiza iha Sede Fatuhada, Dili, segunda ne’e.

Notísia balun kona-ba asuntu nasionál sira seluk mós, nia dehan, la tuir rekezitu no padraun jornalístika nian tanba kobre parte fonte ida de’it, enkuantu parte seluk la hetan biban atu hato’o sira-nia resposta ka deklarasaun, entaun públiku la hetan informasaun kompletu no hetan de’it lia-loos ka verasidade hosi parte ida de’it.

Iha biban ne’e, nia mós husu ba entidade Estadu sira-nian atu respeita nafatin knaar jornalista nian atu labele impede jornalista sira atu asesu ba informasaun hotu-hotu ne’ebé iha ligasaun ho serbisu públiku nian, liuliu informasaun sira kona-ba polítika Governu nian ne’ebé afeta povu barak nia moris.

Iha parte seluk, Prezidente AJTL mós apresia ba jornalista timor-oan sira-nia dedikasaun no determinasaun tomak no kanál mídia hotu-hotu ne’ebé kontinua fó sira-nia kontribuisaun ba prosesu harii demokrásia no dezenvolvimentu nasaun nian liuhosi publikasaun notísia no programa oioin maske ho limitasaun barak.

“Apresia no hato’o obrigadu wa’in ba dedikasaun, determinasaun tomak no espiritu aas jornalizmu nian hosi jornalista Timor-oan no kanál mídia sira hotu ne’ebé kontinua kontribui ba prosesu harii demokrásia no dezenvolvimentu nasionál. Aktu ne’e la sees hosi papél informativu no papél kontrolu sosiál jornalista no mídia nian atu garante transparánsia no kontabilidade iha país ne’e. Husu ba jornalista hotu-hotu atu kuidadu aan nafatin no kumpri protokolu saúde nian bainhira halo kobertura iha terrenu, liuliu iha fatin risku no potensiál ba propagasaun COVID-19,” nia dehan. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here