Diretór Ezekutivu SERVE, Florêncio Sanches. Imajen TATOLI/Jogerjo Guterres

DILI 28 abríl 2021 (TATOLI)—Ministériu Koordenadór Asuntu Ekonómiku (MKAE) fó ona instrusaun ba Servisu Rejistu Verifikasaun Emprezariál (SERVE) no Kámara Komérsiu no Indústria Timor-Leste (CCI-TL, sigla portugés) atu halo levantamentu dadus ba empreza sira ne’ebé sofre impaktu COVID-19.

“Ministru fó orientasaun iha semana kotuk atu haree didi’ak empreza ne’ebé hetan sofrimentu iha situasaun COVID-19, hahú hosi marsu 2020,” Diretór Ezekutivu SERVE,  Florêncio Sanches, informa ba Agência TATOLI, iha ninia knaar fatin, Hudi-laran, kinta ne’e.

SERVE no CCI-TL halo levantamentu dadus ho kolaborasaun hosi Ministériu Administrasaun Estatál (MAE), maibé parte servisu verifikasaun sei verifika tuir lei.

“CCI-TL haruka naran empreza sira mai dala-ida, maibé tuir lei ba sira ne’ebé maka hetan rejistu komesiál no sertifikadu autorizasaun hosi SERVE no sira ne’ebé kontribui ba taxa mak tama lista,” nia akresenta.

Tuir Diretór, sofrimentu ne’ebé empreza sira hasoru ne’e faze tolu hanesan COVID-19, kestaun polítiku no inundasaun foin lalais.

“Ami halo koordenasaun mós ho parte Ministériu Finansa liuhosi Autoridade Tributária hodi fornese mós dadus no SERVE manda dadus ba Governu atu haree katak empreza boot barak maka hetan sofrimentu no empreza kiik barak mós sofre,” nia hatutan.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here