Inan Feton sira husi Munisipiu Manatuto halo apresentasaun tutur sana-rai bainhira partisipa iha konkursu iha Lauhata, Liquica, 28 Novembru 2020. Imajen Tatoli/Antonio Goncalves

DILI, 29 abríl 2021 (TATOLI)-Administradór Munisípiu Manatuto, Fernando de Sousa Junior, informa Orsamentu Jerál Estadu (OJE) tinan 2021 ne’ebé aloka ba Munisípiu Manatuto ho montante $4.567.845 foin ezekuta  ba kategoria lima ho persentajen 21%.

“Ezekusaun OJE 2021 ne’ebé aloka mai Munisípiu Manatuto hamutuk $ 4.567.845, ba kategoria lima, mak bens servisu, saláriu vensimentu, kapitál menór, transferénsia públika no kapitál dezenvolvimentu,” Fernando de Sousa Junior, informa ba Agência Tatoli via telefónika, kinta ne’e.

Kapitál menór nian, nia dehan, dezde alokadu OJE 2021 ba sira seidauk implementa to’o agora tanba halo konkursu públiku presiza to’o mai iha nasionál.

“Kapitál menór fali to’o agora ami seidauk ezekuta tanba presiza to’o iha nasionál tanba kapitál menór ne’e ezemplu sosa karreta sira ne’e ami munisípiu iha ne’e la iha kompañia kapasidade atu halo ne’ebé konkursu públiku  tenke involve to’o kompañia iha nivel nasionál,” nia hateten.

Kapitál dezenvolvimentu nia haktuir, razaun seidauk bele ezekuta tanba to’o agora sira-nia projetu ne’e halo verifikasaun iha Ajénsia Dezenvolvimentu Nasionál (ADN).

“Orsamentu ba kapitál dezenvolvimentu mós ko’a 60% ba kalamidade ne’ebé foin lalais akontese ne’e entaun ida-ne’e mós impaktu ida, maibé ami nafatin esforsu ezekuta 40% ne’ebé sei iha, entaun, ami hein de’it rezultadu hosi ADN atu halo konkursu públiku ba projetu balun,” nia dehan.

Munisípiu Ainaro nia ezekusaun foin atinje 17.70%

Edifísiu Administrasaun Munisípiu Ainaro, Imajen/Tatoli Egas Cristóvão

Hosi sorin seluk Diretór Finansas Munisípiu Ainaro, Ruivo Barros Magno, informa ba Agência Tatoli katak ezekusaun Orsamentu Jerál Estadu (OJE) 2021 alokadu ba Munisípiu Ainaro montante $3.672.443 foin atinje 17.70%.

“Alokasaun OJE 2021 ne’ebé mai Munisípiu Ainaro tinan ne’e hamutu  3.672.443, entaun gasta ona $638.979.60, saldu atuál $2.625.786 no persentajen ezekusaun foin atinje17.70%, inklui ba saláriu vensimentu, transferénsia públiku, bens servisu,” Ruivo Barros Magno haktuir.

Nia esplika kapitál menór orsamentu hamutuk $97.371 entaun tinan ne’e aloka ona ba Postu Administrativu haat iha Munisípiu Ainaro nian tanba orsamentu ne’e kada postu ida hetan $100.000.

“Osan ne’ebé ami haruka ba Postu sira ne’e oinsá atu hola sasán hanesan motorizada, komputadór mobiliáriu hanesan meza, kadeira ba Postu Administrativu sira, entaun nia prosesu agora la’o ona hein loke konkursu públiku ba kompañia interesante sira,” nia dehan.

Kapitál dezenvolvimentu, nia haktuir, tinan ne’e sira iha Munisípiu Ainaro hetan projetu ruma mak hanesan konstrusaun Edifísiu Postu Ainaro Vila, no konstrusaun edifísiu Postu Administrativu Hatudo.

“Ida ne’e prosesu la’o hotu ona, maibé foin lalais ami rona fali informasaun diskusaun iha Parlamentu Nasionál orsamentu retifikativu ne’e iha alterasaun orsamentu kapitál dezenvolvimentu ko’a fali 60% ba kalamidade,” nia tenik.

Jornalista       : Arminda Fonseca

Editór             : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here