IGE kontinua normaliza hikas estrada no ponte ne’ebé hetan estragu tanba inundasaun. Imajen TATOLI/António Gonçalves

DILI, 29 abríl 2021 (TATOLI)–Governu liuhosi Ministériu Obra Públika (MOP) hamutuk ho Institutu Jestaun Ekipamentu (IGE, sigla portugés), ho apoia hosi empreza nasionál sira, halo ona normalizasaun estragu iha munisípiu afetadu sira, kauza dezastre naturál iha domingu (04/04).

“Progresu normalizasaun no limpeza iha mota, estrada no ponte iha kapitál Dili no munisípiu afetadu dezastre naturál atinje ona 90%, hela de’it sítiu tolu mak seidauk hosi sítiu 100-resin ne’ebé konsege kompleta ona,” Ministru Obra Públika, Salvador Eugênio Soares dos Reis Pires, hateten iha Palásiu Governu-Dili, kinta ne’e.

Atividade normalizasaun no limpeza hetan apoiu mós hosi empreza hamutuk 20-resin .

“IGE toma konta iha lokál 50-resin no empreza sira ne’ebé ho vontade rasik, apoia atividade iha lokál 50-resin, ne’ebé kuaze konklui ona,” nia akresenta.

MOP-IGE mós kontinua halo normalizasaun iha munisípiu ne’ebé hetan impaktu maka’as dezastre naturál hanesan Aileu-Remexio, tanba rekursu ladún sufisiente atu fahe ekipamentu pezadu sira ho estragu kuaze iha terrítoriu laran tomak.

“Ita kuaze normaliza estrada no ponte prinsipál sira, atu garante konektividade fíziku terrestre iha semana rua nia laran no limpeza hasai sedimentasaun sira iha mota, nune’e bainhira akontese fali udan, ita bele prevene inundasaun,” nia hatutan.

Nia dehan, iha augostu 2020, MOP-IGE halo ona planu antisipasaun halo intervesaun normaliza mota iha munisípiu sira hodi hamenus oituan estragu, maski dezastre naturál iha tinan ne’e maka’as liután.

Daudaun ne’e, entidade rua ne’e finaliza ona normalizasaun estrada no ponte ligasaun Dili bá munisípiu iha zona haat.

“Ita haree ba zona iha rai klaran hanesan parte Leste no Súl inklui Ponte Bilimau mós bele asesu ona, ne’ebé hela de’it Aileu-Remexio nian,” nia subliña.

Aleinde ne’e, ekipa téknika sira kontinua halo identifikasaun liuhosi kooperasaun Ministériu Admnistrasaun Estatál (MAE) no autoridade lokál sira, inklui Obra Públika nível munisipál hodi hein relatóriu hodi aprova no halo rekuperasaun.

Maski nune’e, Konsellu Administrasaun Fundu Infraestrutura (KAFI) liuhosi  orientasaun Primeiru Minsitru, Taur Matan Ruak, deside ona atu rekupera imdiata mota iha RTK-diresaun Maloa bá Tuana-laran, estrada Bidaun iha Hospital Nasional Guido Valadare (HNGV) nia kotuk, estraga ligasaun Tibar bá Ermera, Ponte Loes, Ponte Bekusi-Taibesi no estrada CPLP ba tasi ibun Bebonuk inklui estrada kotu ne’ebé rekupera ona iha Embaixada Japaun oin.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here