Kondisaun komunidade sira-nia uma iha Masin lidun, Lagoa Tasi-tolu, domingu (25/04). Imajen TATOLI/António Gonçalves

DILI, 29 abríl 2021 (TATOLI)–Vise Primeiru-Ministru no Ministru Planu no Ordenamentu (MPO), José Maria dos Reis, elabora no aprezenta konjuntu medida ordenamentu territóriu ba prevensaun no mitigasaun ba risku dezastre naturál, iha reuniaun Konsellu Ministru (KM).

“Halo ona levantamentu dadus kona-ba área risku ne’ebé lokaliza iha zona inundasaun no área foho lolon sira, ho perigozidade média to’o a’as. Aprezenta mós nesesidade intervensaun lejislativa iha ámbitu ordenamentu territóriu, opsaun ba realojamentu temporáriu no definitivu ba populasaun sira, inklui posibilidade fatin ba realojamentu,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu, kinta ne’e.

Portavós Governu ne’e hatutan, MPO aprezenta dadus inklui proposta oinsá ba futuru Governu halo desizaun ba populasaun hirak ne’ebé sai vítima ba inundasaun.

“Sé atu realoja sira ka atu kria fatin temporáriu, hafoin realoja ba futuru, ka balun iha interese atu filafali ba munisípiu. Desizaun hirak me’e aprezenta iha Konsellu Ministru no modelu intervensaun ne’ebé tempu tuir mai sei finaliza hafoin desizaun sira ne’e sei sai hanesan guia intervensaun Governu nia ba futuru,” nia akresenta.

Governante ne’e dehan, bainhira implementa loloos ona maka sei kolabora ho entidade hotu inklui komunidade.

“Intervensaun Governu integradu no bele fó serteza katak rekonstrusaun ne’e di’ak liu fali situasaun anteriór, signifika bainhira Governu rekonstrui obra ruma, garante katak sidadaun la ba fali situasaun piór,” nia hatutan.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here