Prezidente Repúblika, Francisco Guterres ‘Lú Olo’. Imajen TATOLI/Egas Cristóvão

DILI, 29 abríl 2021 (TATOLI)—Prezidente Repúblika, Franciso Guterres Lú Olo, hatete lian portugés nafatin sai kestaun boot ida iha sistema justisa formál iha Timor-Leste tanba ajente justisa sira seidauk domina portugés ho didi’ak.

“Lian lian portugés sei nafatin kestaun boot ida iha sistema justisa formál. Konstituisaun rekoñese Tetun no Portuges nu’udar lian ofisiál. Haree ba situasaun lian Tetun nian ohin loron, importante tebes halo parseria ho lian portugés nu’udar dalan atu moderniza Tetun. Prosesu ne’e sei han tempu. Ida ne’e signifika ita sei uza Portugés liuliu iha ita-nia lejislasaun ba tempu naruk,” Prezidente Repúblika, Francisco Guterres ‘Lú Olo’, hateten liuhosi ninia diskursu iha serimónia toma pose ba prokuradór Jerál Repúblika, Alfonso Lopez, iha Palásiu Prezidensiál Nicolau Lobato, Bairru Pite, kinta ne’e.

Xefe Estadu ne’e hatutan, lian portugés sai nafatin kestaun tanba ajente justisa sira seidauk domina portugés,  lian ko-ofisial Timor-Leste nian, entaun ida-ne’e hanesan pontu fraku ida ne’ebé Timor-Leste tenke halo investimentu liután atu kapasita ajente justisa sira.

Iha artigu 26 hosi Lei Inan nian garante ba hotu-hotu, direitu fundamental atu iha asesu ba Tribunal sira atu defende direitu no interese tuir lei haruka, no atu hetan direitu ida-ne’e, Timor-Leste tenke haka’as-aan atu hala’ o traballu koletivu ba beibeik.

“Hotu-hotu ne’ebé iha kompeténsia iha setór justisa formál Estadu nian, entre sira-ne’e, juis sira, prokuradór sira, defensór públiku sira, advogadu sira, ofisiál justisa sira no membru polísia sira bele konta ho ha’ u-nia apoiu pesoál no apoiu institusionál hosi Prezidénsia Repúblika iha prosesu hato’o servisu ba ita-nia Povu. Maibé, ita hotu sei haktuir beibeik prinsípiu katak entidade ida-idak iha nia kbiit keta-ketak,” PR hateten.

Tuir konstituisaun artigu 26 (Asesu ba tribunál sira) haktuir; (1) Ema hotu-hotu iha direitu atu ba tribunál hodi defende sira-nia direitu no interese sira-ne’ebé lei fó protesaun ba; no (2) Labele nega justisa ba ema ida, tanba de’it nia la iha kbiit osan nian.

Iha artigu 13 (Lian ofisiál no nasionál) hateten; (1) Repúblika Demokrátika Timór-Leste nia lian ofisiál maka Tetun no Portugés; no (2) Estadu valoriza no dezenvolve Tetun no lian nasionál sira seluk.

Notísia Relevante: Majistradu Ministériu Públiku labele permite intervensaun polítiku-partidária

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here