Produtu lokál iha merkadu. Imajen TATOLI/António Gonçalves

DILI, 29 abríl 2021 (TATOLI)–Ministériu Finansa (MF) liuhosi Diresaun Nasionál Estatístika (DNE) fó sai mudansa persentajen índise Presu Konsumedór (IPK) mensál hosi grupu hotu ne’ebé sa’e +0,7% iha marsu 2021 kompara ho fevereiru +0,4%.

Tuir nota ne’ebé Agência TATOLI asesu iha kinta ne’e, mudansa presu hosi grupu hotu 0,7%  tanba hetan kontribuisaun hosi grupu hahán no bebida la’ós alkólika (+1,0%), alkohol no tabaku (+1,9%), ekipamentu no manutensaun mobiliáriu uma-laran (+0,6%), ho transporte (+0,4%). 

Hahán no bebida la’ós alkólika sa’e tanba hetan impaktu maioria hosi sub-grupu foos (+2,8%), modo-tahan (+0,8%), susubeen, keiju no manu-tolun (+1,2%), mina no bokur (+1,2%), ai-fuan (+1,0%) no masin-midar, marmelada, bani-been, cokolate, no hahán-midar (+0,6%).

Enkuantu, bebida, jus, ai-fuan, no modo-tahan (-0,8%) sai hanesan mudansa kontráriu ba inflasaun grupu hahán no bebida la’ós alkólika. 

“Mudansa persentajen IPK annuál sa’e (+2,9%), kompara marsu 2021 ho marsu 2020, hetan kontribuisaun hosi grupu hahán no bebida la’ós alkólika (+4,4%), alkohol no tabaku (+7,5%),  uma (+0,4%), Transporte (-0,3%), hatais no sapatu (-0,1%), ekipamentu no manutensaun mobiliáriu uma-laran (-0,2%), no rekreasaun no kultura (-0,1%) sai hanesan mudansa kontráriu ba annuál marsu 2021,” refere nota.

Inflasaun tradeable sa’e (+0,8%) no non-tradeable sa’e (+0,6%) iha mensál kompara entre marsu 2021 ho fevereiru 2021.

Inflasaun tradeable sa’e (+3,5%) no non-tradeable sa’e (+1,5%) iha annuál kompara entre fulan-marsu 2021 ho marsu 2020.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here