Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu. Imajen TATOLI/Egas Cristovão

DILI, 29 abríl 2021 (TATOLI)—Governu liuhosi reuniaun Konsellu Ministru (KM) aprova ho alterasaun projetu Rezolusaun Governu ba impozisaun konfinamentu domisiliáriu jerál iha munisípiu Dili.

“Tenke hela iha uma ka iha sira nia alojamentu temporáriu, hahú tuku 00:00 loron 30 abríl 2021 to’o tuku 23:59 loron 13 maiu 2021,” Ministru Prezidénsia Konsellu Ministru, Fidelis Manuel Leite Magalhães, informa hafoin reuniaun ezekutivu, iha Palásiu Governu, kinta ne’e.

Maski nune’e, iha esesaun ba ema sira ne’ebé sai hosi hela fatin ka alojamentu temporáriu iha munisípiu Dili.

“Bainhira tenke ba ospitál atu konsulta ba médiku no atu hetan ai-moruk, atu akompaña membru família ka ema ne’ebé nia maka tau matan hodi hetan asisténsia iha ospitál, médiku no ka atu hetan ai-moruk, atu fó asisténsia ba ema seluk ne’ebé presiza ho razaun saúde nian, protesaun sosiál ka asisténsia umanitária,” nia akresenta.

Nune’e mós, bainhira sidadaun ida atu aprezenta keixa ka denúnsia iha Ministériu Públiku iha Provedoria Direitu Umanu no Justisa ka iha kualkér órgaun polísia kriminál, atu komparese iha dilijénsia judisiál ka polisiál ne’ebé simu notifikasaun, atu sosa ai-han, refeisaun, sasán ba primeira nesesidade ka kombustível, atu selu servisu eletrisidade, telekomunikasaun ka asesu ba internet nian.

Iha mós esesaun bainhira atu hetan asesu ba servisu finanseiru, atu halo atividade profisionál, bainhira superiór ierárkiku la fó dispensa, iha kazu  funsionáriu, ajente ka traballadór administrasaun públika nian, ka bainhira entidade empregadora rasik la fó dispensa, iha kazu traballadór iha setór privadu ekonomia.

“Atu partisipa iha funerál sira, tenke tuir regra ne’ebé prevee iha Rezolusaun Governu inklui atu rekere autorizasaun sai husi munisípiu Dili,” nia hatutan.

Autoriza halo dezlokasaun durante tempu ne’ebé presiza tebes atu konkretiza objetivu dezlokasaun no bainhira akontese tanba razaun serbisu.

“Ema tenke lori no aprezenta dokumentu bainhira iha obrigasaun atu bá no hela iha serbisu fatin,” subliña Ministru.

Aleinde ne’e, bandu transporte públiku hanesan mikrolets, biskota, taksi sira no anguna sira atu hala’o movimentu iha área sira hotu iha munisípiu Dili.

Suspende atividade komersiál no sosiál

Estabelesimentu komersiál, industriál, artezanál no prestasaun servisu setór privadu ekonomia hotu ne’ebé dezenvolve atividade iha munisípiu Dili, tenke taka ba públiku.

“Exetu estabelesimentu komersiál sira ne’ebé fa’an ai-han, bee no sasán esensiál seluk, liuliu supermerkadu, minimerkadu no kiós sira, estabelesimentu sira ne’ebé presta kuidadu médiku no fa’an ai-moruk, estabelesimentu sira ne’ebé presta servisu protesaun sosiál, farmásia sira,” Ministru dehan.

Iha esesaun mós ba postu kombustível ka gás, estabelesimentu komersiál iha ne’ebé hala’o pagamentu ba fornesimentu enerjia elétrika, asesu internet ka telekomunikasaun, órgaun komunikasaun sosiál, estabelesimentu oteleiru no sira ne’ebé hanesan, tuir regra ne’ebé estabelese iha Rezolusaun Governu ne’e nian.

Enkuantu, ba restaurante, warung no fatin fa’an hahán sira ne’ebé hanesan, tenke kumpre tuir regra ne’ebé estabelese iha Rezolusaun Governu.

Governu mós fó flesibilidade ba instituisaun finanseira, liuliu banku no entidade sira ne’ebé iha lisensa atu hala’o transferénsia internasionál osan.

Nune’e mós, ba empreza konstrusaun sivíl ka estabelesimentu komersiál sira ne’ebé fa’an materiál konstrusaun sira, empreza sira ne’ebé presta servisu tékniku manutensaun, reparasaun ka funsionamentu ba sentrál produsaun enerjia elétrika nian ka rede elétrika nasionál, empreza transporte karga nian liuhusi rai, tasi no aéreu nian, estabelesimentu sira ne’ebé fa’an materiál funeráriu ka presta servisu funeráriu nian.

“Maibé tenke tuir regra ne’ebé hatuur iha Rezolusaun Governu,” Portavós Governu dehan.

Iha mós esesaun ba empreza sira ne’ebé presta servisu kontrolu peste no empreza sira ne’ebé presta servisu limpeza ba saneamentu no ezgotu sira.

Tama estabelesimentu komersiál tenke kumpre regra sanitária

Traballadór no kliente estabelesimentu komersiál no empreza molok atu tama ba estabelesimentu komersiál tenke fase liman no taka inus ho ibun ho máskara.

“Durante tempu iha estabelesimentu nia-laran, sira tenke kontinua uza máskara hodi taka inus no ibun, mantein distansiamentu sosiál pelumenus metru ida ho ema seluk, ho ne’ebé sira la hela hamutuk, iha ekonomia komún no sira tenke fase liman beibeik,” Ministru Fidelis dehan.

Bainhira hein atu tama iha estabelesimentu sira, kliente sira tenke hein iha li’ur no mantein distánsia pelumenus metru ida ho ema seluk.

Estabelesimentu komersiál, industriál, artezanál ka prestasaun servisu setór privadu área ekonomia nian taka ba públiku no bele mantein atividade liuhosi servisu entrega ba kliente nia hela fatin.

Restaurante no empreza sira ne’ebé fornese de’it hahán, bele aplika rejime take away (lori ba uma), atu ba han iha uma ka iha lokál alojamentu temporáriu ka liuhosi opsaun atu entrega ba uma ka otél.

“Ema ne’ebé hela iha otél sira tenke han iha nia kuartu rasik,” esplika Portavós Governu.

Enkuantu, atividade implementasaun ba programa Cesta Básika autoriza nafatin ho karatér esesaun.

Merkadu munisipál Dili hahú funsiona

Merkadu munisipál Dili hanesan Merkadu Manleuana no Merkadu Taibesi,  kontinua funsiona hahú hosi tuku 6 dadeer to’o tuku 18:00.

“Operadór no utente ida-idak, molok tama ba merkadu sira ne’e, tenke fase liman no kontinua uza máskara hodi taka inus no ibun, no mós mantein distánsia pelumenus metru ida ho ema seluk, ho ne’ebé sira la hela hamutuk,” informa Ministru Prezidénsia Konsellu Ministru.

Aleinde ne’e, bainhira forsa seguransa sira haree katak labele mantein distánsia sosiál pelumenus metru ida entre utente sira, sei impede utente foun sira atu tama ba resintu merkadu to’o númeru utente sira ne’e sufisiente atu kumpre distánsia ne’ebé temi ona.

Enkuantu, ba vendedór ambulante sasán ka servisu nesesidade bázika, liuliu produtu ai-han, espesialmente modo tahan, no mós komersiante sira ne’ebé hala’o atividade iha merkadu, tenke mantein máskara hodi taka inus no ibun, tenke fase liman beibeik, no mantein distánsia pelumenus metru ida ho vendedór sira seluk no ho kliente sira, no sira mós tenke garante katak ema la halibur malu hamutuk iha fatin ne’ebé sira hala’o sira-nia atividade.

Bandu mós atu hala’o atividade selebrasaun relijioza ne’ebé  implika ezisténsia ema halibur-malu.

Ba efeitu Rezolusaun Governu, konsidera nu’udar ema halibur-malu  maka ema liuhosi na’in-rua halibur malu no menus hosi metru rua entre sira

Bandu organiza no hala’o serimónia funerál ne’ebé ema liu na’in-sanulu maka partisipa.

“Ema ne’ebé partisipa iha serimónia ne’e tenke uza máskara hodi taka inus no ibun, no mantein distánsia pelumenus metru ida ho ema seluk ne’ebé partisipa iha serimónia ne’e,” Portavós Governu hameno.

Autoridade polisiál sira sei fiskaliza kumprimentu regra sira ne’ebé hatuur ona iha Rezolusaun Governu no aviza infratór sira katak se sira kontinua nafatin la kumpre ba Rezolusaun ne’e, bele konsidera hanesan prátika ba krime dezobediénsia.

“Autoridade polisiál sira sei komunika ba Ministériu Públiku inklui infratór bainhira kontinua la respeita regra sira ne’ebé prevee ona iha Rezolusaun Governu ne’e nian. Karik regra sira ne’ebé prevee iha Rezolusaun Governu ne’e iha ema husi rai-li’ur maka la respeita, autoridade polisiál sira sei komunika sira-nia identidade ba Servisu Migrasaun,” Ministru Fidelis esklarese.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here