Montana Diak halo serbisu rekupera estrada iha Embaixada Japaun oin, iha Praia dos Coqueiros. Imajen/MOP

DILI, 28 abríl 2021 (TATOLI)—Governu fó fiar ona ba kompañia Montana Diak halo rekuperasaun emerjénsia ba estrada protokolu ne’ebé kotu iha Embaixada Japaun oin, iha Praia dos Coqueiros, kauza hosi dezastre naturál foin lalais.

“Montana Diak hahú mobiliza ekipamentu iha 20 abríl kalan kedan, ne’ebé to’o agora progresu rekuperasaun atinje ona 40%,” Diretór Nasionál Estrada, Ponte no Kontrolu Cheia, hosi Ministériu Obra Públika (MOP), João Mário Gama de Sousa, informa ba Agência TATOLI, hafoin observa rekuperasaun estrada, kuarta ne’e.

Notísia relevante: Montana Diak iha kapasidade finanseiru no tékniku rekupera estrada

Tuir nia, daudaun kompañia lokál ne’e halo serbisu eskavasaun ne’ebé tuir planu to’o metru 3,6, maibé foin to’o metru 2,10 de’it labele kontinua kee tan.

Aleinde ne’e, ekipa téknika MOP hamutuk ho kompañia deside hapara eskavasaun hodi hahú fali serbisu seluk no finaliza ona iha faze tau fatuk kamada dahuluk sentímetru 60 hafoin tama ba faze seletivu materiál iha kamada daruak ho sentímetru 100.

“Kompañia ne’e hahú foku serbisu ba moru kontensaun, liu-liu homan besi no aban hahú cor beton ba barrajen (concrete) atu satan tasi been, hafoin pasu tuir mai sei tau base course sentímetru 20, hafoin fui alkatraun ACBC kamada dahuluk sentímetru neen no ikus liu fui tan alkatraun ACWC ba faze daruak ho sentímetru haat,” nia esplika.

Tuir Diretór ne’e, atu garante kualidade, daudaun ekipa téknika sira hosi MOP no Ajénsia Dezenvolvimentu Nasionál (ADN) iha hela terrenu hodi halo supervizaun.

“Materiál sira hanesan fatuk no rai henek inklui alkatraun sira ne’ebé kompañia utiliza ba rekonstrusaun estrada, ADN halo ona teste no hetan aprovasaun hosi laboratóriu. Ita-nia laboratóriu MOP hamutuk ho ADN aprova no fó autorizasaun mak sira utiliza materiál ba rekuperasaun, ne’ebé ita garante obra ne’e bainhira ramata sei iha kualidade,” Diretór Nasionál ne’e subliña.

Governu liuhosi MOP ajudika kompañia Montana Diak halo rekuperasaun emerjénsia ba estrada ho kustu ba obra hamutuk $314.000, ho durasaun serbisu fulan ida, hahú 20 abríl to’o 20 maiu tinan ne’e.

“Ita haree empreza mós halais obra ne’ebé maizumenus semana rua tan projetu ne’e bele remata 100% no kompañia prontu entrega,” nia tenik.

Tuir observasaun, Agência TATOLI iha terrenu, nota katak kompañia kontinua halo serbisu monta besi barrajen atubele satan tasi been.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here