Prezidente Repúblika, Francisco Guterres “Lú Olo’ kaer liman ho Prezidente Tribunal Rekursu, Deolindo dos Santos. Imajen/Mídia PR.

DILI, 28 abril 2021 (TATOLI)—Prezidente Repúblika, Francisco Guterres Lú Olo, liuhusi Dekretu Prezidente Repúblika númeru 23/2021, 28 abril, nomea Deolindo dos Santos nu’udar Prezidente Tribunál Rekursu (PTR).

Tuir komunikadu imprensa ne’ebé Agência Tatoli asesu haktuir, Prezidente Repúblika nomea Prezidente Supremu Tribunal de Justisa, entre hosi juiz sira, tuir artigu 86.j, artigu 124 númeru 3, hosi Konstituisaun Repúblika, konforme artigu 128, ho inerensia, Prezidente Konsellu Superior Majistratura Judisiál.

Bazea ba artigu 164, númeru 2 hosi Konstituisaun no artigu 110, númeru 1 hosi Lei númeru 8/2002, 20 setembru, altera ho Lei númeru 11/2004, 29 dezembru (Estatutu Majistradus Judisiais), ne’ebé estabelese Tribunál Rekursu, enkuantu sai “Instánsia Máxima organizasaun judisiária” eziste iha Timor-Leste, ezerse kompeténsia nu’udar Supremu Tribunál de Justisa, to’o ninian funsionamentu.

Artigu 110, númeru 4 hosi Estatutu Majistradus Judisiais, kompete ba Prezidente Repúblika nomea Prezidente Tribunál Rekursu. Estatutu Majistradu Judisiál hateten katak Konsellu Superiór Majistratura Judisiál prezididu hosi Prezidente Tribunál Rekursu.

Tanba ne’e, Prezidente Repúblika, tuir artigu 86,j, artigu 124, númeru 3 no artigu 164, númeru 2 hosi Konstituisaun Repúblika, no artigu 29, númeru 1, artigu 110, númeru 1 no 4 hosi Lei númeru 8/2002, 20 setembru, altera hosi Lei númeru 11/2004, 29 dezembru, dekreta hodi nomea Deolindo dos Santos nu’udar Prezidente Tribunál Rekursu. Dekretu ne’e prodús efeitu hahú husi 29 abril 2021.

Serimónia tomada de posse ba Prezidente Tribunál Rekursu sei hala’o aban, 29 abril, tuku 10.30, iha Palásiu Prezidensiál Nicolau Lobato, Bairru Pite, Dili.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here