Membru Parlamentu Nasionál iha sala plenária. Imajen TATOLI/Egas Cristovão.

DILI, 28 abríl 2021 (TATOLI)—Parlamentu Nasionál (PN), kuarta ne’e autoriza Prezidente Repúblika Francisco Guterres ‘Lú Olo’ dekreta estadu emerjénsia ba dala-XIII iha territóriu nasionál.

Ho rezultadu votasaun nominal a-favór 43 no abstesaun 16 ne’e, PN autoriza Xefe Estadu dekreta estadu emerjénsia ba loron 30 tán, hahú hosi oras 00.00 iha loron 3 maiu 2021 (segunda-feira) no termina iha oras 23.59 loron 1 juñu 2021 (tersa-feira).

“Lei autorizasaun ba renovasaun estadu emerjénsia pasa,” Prezidente Parlamentu Nasionál, Deputadu Aniceto Longuinhos Guterres, anunsia liuhosi plenária.

Xefe Bankada Frente Revolucionária de Timor-Leste Independente (FRETILIN), Deputadu Francisco Miranda Branco, hateten iha Índia deskontroladu tanba ema mate COVID-19 kontinua aumenta.

“Timor-Leste labele deskontrolu hanesan situasaun COVID-19 ne’ebé akontese iha Índia, tanba COVID-19 ezsite duni. Tanba ne’e presiza komprimenta ba regra protokolu sira, tanba ne’e Estadu Emerjénsia nesesáriu duni hodi halo prevensaun ba moras ne’e,” Xefe Bankada FRETILIN hateten.

Bankada FRETILIN apela ba órgaun soberanu sira liuliu Xefe Estadu atu halo mensajen ba públiku hodi fó rekoñesimentu ekipa saúde ne’ebé iha liña oin hasoru surtu COVID-19.

Entretantu Xefe Bankada PUDD, Deputadu António de Sá Benevides, husu Governu atu tetu didi’ak molok estende aplikasaun serka sanitária no konfinamentu domisiliária iha Dili no munisípiu sira.

“Nune’e, labele hakolen Governu nia-aan, maibé apresia Governu nia esforsu atu kombate moras ida-ne’e, bankada PUDD husu povu Timor-Leste komporta-aan hodi kumpri nafatin regra protokolu sira,” nia dehan.

Mensajen Prezidente Repúblika Francisco Guterres ‘Lú Olo nian, propoin ba Parlamentu Nasionál atu halo estensaun estadu emerjénsia ba loron 30 tán iha territóriu nasionál ho parsialmente suspende sirkulasaun internasionál, liberdade sirkulasaun, direitu reuniaun no manifestasaun, liberdade kultu (culto) inklui limita no proibisaun selebrasaun relijioza.

Nune’e mós direitu ba edukasaun inklui halo suspensaun temporária ba prosesu no atividade ensinu aprendizajen ho rejime prezensiál, direitu propriedade no inisiativa ekonómika privada.

Direitu rezisténsia sei impede hosi autoridade públika bainhira sidadaun sira la kumpre medida ezekusaun sira.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here