Profesionál saúde prepara hela ekipamentu hodi halo teste swab iha CCD, tersa (27/04). Imajen TATOLI/António Gonçalves

DILI, 28 abríl 2021 (TATOLI)Sala Situasaun-Sentru Integradu Jestaun Krize (CIGC, sigla Portugés) rekomenda opsaun tolu ba Governu atu kombate transmisaun komunitária ne’ebé akontese ona iha munisípiu Dili.

Iha ámbitu debate estensaun Estadu Emerjénsia ba dala-XIII, CIGC informa situasaun globál no nasionál liga ho COVID-19, hato’o estratejia atu kombate no medida ba proposta Governu atu hasoru konjuntura foun liuhosi evolusaun hosi transmisaun lokál ba komunitária.

“Ita bele hateten COVID-19 kontroladu iha cluster no evolui, ne’ebé fonte transmisaun lokál evolui ona ba fonte transmisaun komunitária. Ita haree COVID-19 hanesan polítika nasionál hodi buka konsentrasaun Governu nian, nune’e estabelese estratejia hotu atubele kombate,” Koodenadór Estadu Maiór Sala Situasaun-CIGC, Komodoro Donaciano Costa Gomes ‘Pedro Klamar Fuik’, relata iha sala plenária, kuarta ne’e.

Opsaun ne’ebé CIGC rekomenda, dahuluk mak hanesan aseita nova normalidade, ne’ebé lalika impoin Serka Sanitária, lalika halo konfinamentu domisiliáriu jerál, lalika halo proibisaun ba aglomerasaun, lalika halo aula eskola, la bandu atividade relijioza no la fó subsídiu agregadu familiár

“Maibé halo de’it detensaun restreia ka halo tratamentu no halo de’it medida prevensaun ijiene pesoál inklui halo de’it fiskalizasaun ba fatin públiku sira,” nia akresenta.

Opsaun daruak, presiza impoin Serka Sanitária, sein konfinamentu domisiliáriu, la bandu aglomerasaun, lalika halo proibisaun aula atividade apredizajen, lalika halo proibisaun ba selebrasaun relijioza sira, maibé fó subsídiu ba agregadu familiár ba redimentu la fixu no bainhira deteta kazu tenke halo medida prevesaun no halo fiskalizasaun.

Opsaun ikus, aplika konfinamentu domisiliáriu jerál iha Dili no Serka Sanitária, bandu ba aglomerasaun, probisaun aula atividade prosesu apredizajen, no probisaun atividade relijoza, maibé subsídiu ba agregadu familiár sira tenke fó, tenke halo medida preventiva hanesan ejiene pesoál no prosesu fiskalizasaun tenke halo.

“Ami Sala situasaun hanoin no iha intedimentu katak propoin no rekomenda opsaun di’ak liu mak opsaun rua no tolu atu kombate transmisaun komunitária iha Dili no hapara kontájia ba munisípiu sira,” nia subliña.

Nia dehan, fatór rua importante atu kombate COVID-19, maka presiza iha unidade pensamentu no asaun hosi líder nasionál no líder istóriku sira hotu tanba bainhira susesu sei marka kreabilidade no prestíziu ba nasaun.

Nune’e, CIGC hakarak alerta ba sidadaun hotu katak COVID-19 hanesan inimigu komum ida ne’ebé atu kombate presiza kontribuisaun autoridade Estadu no konsénsia sidadaun hotu.

Haree eskala transmisaun nasionál hosi loron 07 marsu to’o 27 abríl 2021, ho totál loron lkontabilizadu hamutuk loron 52, hosi loron ne’e númeru komulativu kazu pozitivu hamutuk 1.772 no mate na’in-tolu.

Hosi ne’e, amostra sira ne’ebé hasai barak liu hosi sidadaun ne’ebé hakarak ba munisípiu.

Durante loron 18 aplikasaun teste ba sidadaun hamutuk amostra 7.102, iha ne’e mak númeru pozitivu sa’e barak.

“Ida-ne’e hatudu katak Dili iha kazu barak ona no balun detetadu ona maibé barak mós seidauk, ne’ebé Dili sai ona sentru ba transmisaun komunitária ka makro cluster ne’ebé mak bele halo transmisaun ba nível territoriál ka Timór tomak,” nia tenik.

Durante loron 52, iha munisípiu Dili rejista kazu pozitivu hamutuk 1.495 no Timor-Leste rejista kazu komulativu desde loron 01 marsu 2020 to’o 27 abríl 2021 hamutuk 2.044 no kazu ativu 1.000-resin.

“Ita haree ita-nia sistema frajilizadu no grave liután bainhira akontese sinklone tropical seroja iha loron domingu (04/04), ne’ebé afeta ba munisípiu Dili no impoin Serka Sanitária, tanba ne’e Goveru tenke suspende konfimamentu obrigtatóriu domiliáriu obrigatóriu iha Dili ne’ebé sai sentru kazu pozitivu no transmisaun komunitária ona,” nia haktuir.

Atubele kombante transmisaun hosi Dili ba munisípiu, CIGC mós husu atu aplika ho rigór Serka Sanitária, re-introdús fali kofinamentu domisiliáriu obrigatóriu loron-14 no rigór bandu atu labele halibur malu inklui fiskaliza kumprementu regra sira ne’ebé estabelesidu.

Tuir dadus mundiál, hatudu kazu konfirmadu hamutuk millaun 147-resin no mate hamutuk ema millaun 3-resin.

Enkuantu, dadus hosi nasaun viziñu Timór Osidentál, Indonézia iha kazu konfirmadu hamutuk ema 14.200 no mate 368.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here