Vasina AstraZeneca, Imajen TATOLI/António Gonçalves

DILI, 27 abríl 2021 (TATOLI)–Ministra Saúde, Odete Maria Freitas Belo, klarifika, bazeia ba rezultadu preliminár ne’ebé mak Ministériu Saúde (MS) halo ba funsionáriu Bombeiru, identifika katak nia moras laiha ligasaun ho vasina AstraZeneca kombate COVID-19 ne’ebé nia simu ona.

“Funsionáriu Bombeiru ne’e iha kazu espesífiku, bainhira nia simu vasina iha dadeer, tama lorokraik nia moras stroke. Tanba ne’e, ami halo ona investigasaun ba RX (funsionáriu Bombeiru), ne’ebé pesoál saúde sira halo CT scan no fó sai rezultadu preleminár, haree ona ninia istória moras hatudu laiha ligasaun ho vasina ne’ebé simu,” Ministra Saúde relata hafoin ramata enkontru ho Primeiru-Ministru, Taur Matan Ruak, iha Rezidénsia Farol, tersa ne’e.

Maski nune’e, tuir Ministra, profisionál saúde sira sei sura nafatin ho reasaun adversa no kontinua halo investigasaun atu haree katak karik iha duni ligasaun vasina ne’ebé nia simu ho moras ne’ebé nia hetan.

Governante ne’e esplika, bainhira ema ida atu vasina, profisionál saúde sira sempre husu uluk istória moras.

“Normalmente profisionál saúde ne’ebé mak fó atendimentu kaer surat tahan ida hodi hakerek, kuandu sira prienxe surat tahan ne’e signifika sira husu buat ruma iha ne’ebá kona-ba iha moras ruma ou lae,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here