Diretór Agró- Komérsiu no Kooperasaun Setór Privadu, hosi MAP, Fernando Egidio Amaral. Imajen/Natalino Costa

DILI, 27 abríl 2021 (TATOLI)Diretór Agró- Komérsiu no Kooperasaun Setór Privadu, hosi Ministériu Agrikultura Peska (MAP), Fernando Egidio Amaral, rekoñese produtu lokál hanesan foos rai no seluk tan ne’ebé fa’an iha Loja Agrikultór rua iha Dili hahú menus.

“Loja Agrikultór rua iha Meimart Fatuhada no Timor Plaza hahú menus tanba implementasaun Serka Sanitária no Estadu Emerjénsia, ne’ebé bainhira halo transferénsia produtu hosi munisípiu mai Dili tenke ho karta,” Diretór dehan ba Agência TATOLI, iha ninia knaar fatin, edifísi MAP, Comoro, tersa ne’e.

Kestaun seluk maka bainhira iha tempu udan no inundasaun foin lalais halo kotu konektividade entre sentru produsaun produtu iha área rurál mai munisípiu no mai Dili.

“Ita haree estrada kotu no difikuta transporte, seluk maka transporte sira presu sa’e, ne’ebé hosi kestaun sira ne’e maka halo produtu labele mai no ita haree produtu iha Loja Agrikultór menus,” nia esklarese.

Kestaun seluk ne’ebé halo produtu lokál menus maka udan boot no kauza inundasaun estraga produtu lokál sira ne’ebé foin kuda hetan estragu.

Maski nune’e, Responsável Loja Agrikultór ho ninia ekipa kontinua serbisu maka’as iha tempu Serka Sanitária, ho kolaborasaun Sala Situasaun  Sentru Integradu Jestaun Krize (CIGC, sigla portugés) hodi bele transporta produtu lokál iha portaun entrada Meitnaro, Beduku no Tasi Tolu.

“Ha’u ho ekipa kontinua serbisu kolabora ho parte CIGC hodi aluga karreta tula produtu lokál mai iha Dili no ami halo tranferénsia iha pontu entrada Dili tanba kondisaun,” nia akresenta.

Tuir nia, ita labele provoka inflasaun ho situasaun atuál, maibé bele esforsu normaliza konetividade iha área urbana inklui sidadade atu nune’e abitante 350.000 iha Dili bele iha kapasidade kompra,” nia subliña.

Ba kestaun ne’e, parte Diresaun Agro-Komérsiu halo ona kontaktu iha semana kotuk ho komunidade agrikultór iha postu Administrativu Iliomar no komunidade agrikultór iha munisípiu Viqueque atu transporta foos rai maibé daudaun seidauk iha informasaun.

Jornalista: Natalino Costa   

Editora: Julia Chatarina

HAKEREK NO HATÁN

Please enter your comment!
Please enter your name here