Membru Parlamentu Nasionál iha sala Plenária Parlamentar. Imajen TATOLI/Egas Crstovão.

DILI, 27 abríl 2021 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, tersa ne’e haruka ona proposta Orsamentu Retifikativu (OR) liuhosi alterasaun Orsamentu Jerál Estadu (OJE) 2021 ba Prezidente Repúblika Francisco Guterres ‘Lú Olo’.

Notísia Relevante: PN aprova Orsamentu Retifikativu iha finál globál

“Orsamentu Retifikativu ne’ebé Parlamentu Nasionál aprova ona, ohin dadeersan hosi Parlamentu Nasionál haruka ba Prezidénsia Repúblika atubele halo promulgasaun,” Sekretária Meza Parlamentu Nasionál, Deputada Lídia Norberta dos Santos, informa ba jornalista sira, iha uma fukun.

Reseita konsolidada setór administrasaun públika ho montante biliaun $2.245,6, enkuantu despeza konsolidada setór administrasaun públiku ho montante biliaun $2.165,1.

Nune’e reseita órgaun no servisu administrasaun sentrál biliaun $1.932,5 ne’ebé koloka ba klasifikasaun ekonómika kompostu hosi saláriu no vensimentu millaun $229,7 (orijinál millaun $239,2), millaun $613,0 (orijinál millaun $421,49) ba bens (sasán) no servisu, millaun $696,7 (orijinál millaun $669,91) ba transferénsia públika, millaun $55,1 (orijinál millaun $61,14) ba kapitál menór no millaun $338,1 (orijinál millaun $503,20) ba kapitál dezenvolvimentu. Entretantu alterasaun ne’e la afeta ba orsamentu RAEOA no Seguransa Sosiál.

Deputada Lídia Norberta dos Santos Martins nu’udar mós portavós Parlamentu Nasionál, fó-sai katak orsamentu administrasaun sentrál iha aumenta millaun $135,3 ho totál biliaun $1.932 tanba montante millaun $135.3 ekivalente ho despeza ne’ebé mai hosi reseita.

Nia esplika, iha dotasaun fundu COVID-19 ho montante millaun $31 hetan ona reforsa ho millaun $256-resin ne’e mak totál millaun $287-resin.

Sekretária Meza Parlamentu Nasionál esplika, reforsa iha dotasaun Fundu COVID-19 ne’e mai hosi relalokasaun dotasaun orsamentál hosi Fundu Infraestrutura (FI) no Dotasaun ba Governu Tomak.

Nune’e mós iha dotasaun Fundu Infraestrutura hetan mudansa iha montante hosi millaun $339-resin tún ba millaun $280-resin tanba reforsu iha dotasaun Fundu Covid-19 ne’ebe mai husi dotasaun Fundu Infraestrutura hamutuk millaun $58,713.

Nune’e, iha dotasaun Fundu Kontinjénsia anteriór millaun $23,763, aumenta ho millaun $41,388 sa’e ba montante $65,151.

Purtantu ho alterasaun dahuluk ba Lei 14/2020, 29 dezembru kona-ba Orsamentu Jerál Estadu (OJE) 2021 sei finansia medida sira sósiu-ekonómika hanesan apoiu ba empregu, moratória kréditu, izensaun pagamentu propinas no subsídiu internet ba estudante ensinu superior.

Nune’e mós, orsamentu ne’e sei sosa produtu alimentár hosi produtór lokál, subsidiu ba eletrisidade, finánsia operasaun Sentru Integradu Jestaun Krize (CICG-sigla portugés), finánsia suplementu remuneratóriu ba traballadór liña-frente sira no konklui ho pagamentu ba programa cesta bázika

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here