MInistru Edukasaun Joventude no Desportu, Armindo Maia. Imajen Tatoli/Egas Cristovão.

DILI, 27 abríl 2021 (TATOLI) – Ministru Edukasaun Juventude no Desportu (MEJD), Armindo Maia, halo ona observasaun ba eskola Ensinu Sekundáriu Tékniku Vokasionál (ESTV) Becora, atu bele utiliza ba fatin izolamentu.

Ministru Armindo Maia, hateten ba jornalista-sira, tersa ne’e, iha Ministériu Edukasaun, Juventude no Desportu, Vila Verde, Dili,  katak foin lalais sira ba haree ona eskola ensinu sekundáriu Tékniku Vokasionál Becora para atu responde preokupasaun Ministériu Saúde no Sentru Integradu Jestaun Krize nian kona-ba númeru pozitivu COVID-19 ne’ebé loron ba loron aumenta.

“Ida ha’u hatene ona ne’e mak eskola TEKVOK Becora. Tan ne’e iha domingu ami ba halo ona observasaun ba eskola ne’ebá para atu hatene ninia kondisaun. maibé eskola sira seluk ha’u seidauk hatene,” Ministru Armindo Maia hateten.

Kona-ba destinu estudante sira nian, Armindo Maia konfesa katak, karik Eskola TEKVOK ne’e sai duni fatin izolamentu, sira sei deside fahe rua para parte eskola bele kontinua utiliza espasu balun ba sira ninia atividade.

Halo limpeza bá  eskola besik 10

Ministériu Edukasaun Juventude no Desportu (MEJD) hatuur ona planu no programa hahú kuarta ka kinta mai ne’e, sei halo limpeza ba eskola besik 10 iha Dili-laran ne’ebé afetadu hosi inundasaun iha loron 04 abríl liubá ne’e.

Ministru Edukasaun Juventude no Desportu, Armindo Maia, hateten atividade limpeza ne’e sei involve parte lubuk ida hanesan, Funsionáriu MEJD, SEJD, Korpu Bombeiru, membru F-FDTL no karik iha posibilidade sei involve mós grupu arte marsiál balun.

“Se la aban parese bainrua, ita sei realiza atividade limpeza iha eskola 10 ne’ebé mak identifika ona afetadu ba inundasaun,” Armindo Maia hateten.

Ministru Armindo akresenta katak maske identifika ona besik eskola 10 mak sei hetan limpeza maibé nia seidauk hetan dadus kona-ba eskola sira-ne’e. Impotente liu mak planu no programa sira ne’e bele hetan partisipasaun hosi parte sira hotu hodi bele rekoopera fali kondisaun iha eskola sira ne’e.

Jornalista       : Tomé Amado

Editór             : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here