Embaixadór Repúblika Demokrátika Arabe Saharawi, Mohamed Slama Badi. Imajen TATOLI/Egas Cristovão

DILI, 27 abríl 2021 (TATOLI)—Embaixadór Repúblika Demokrátika Arabe Saharawi iha Timor-leste, Mohamed Slama Badi, ohin, hasoru malu no despede Xefe Estadu, Francisco Guterres Lú Olo, hodi ko’alia kona-ba ninia mandatu no misaun ramata iha Timor-Leste, iha Palásiu Prezidénsia Nicolau Lobato, Bairru Pite, Dili.

“Ho onradu ha’u hasoru malu no halo despedida Prezidente Republika, Francisco Guterres Lu Olo, tanba ha’’u-nia misaun no mandatu nu’udar Embaixadór Repúblika Demokrátika Saharawi iha Timor-Leste ramata ona. Ida-ne’e hanesan oportunidade atu konfirma mós kona-ba polítika entre nasaun rua iha relasaun bilaterál nian,” Mohamed Slama Badi hateten ba jornalista sira, tersa ne’e.

Embaixadór Saharawi hateten, povu nasaun rua ne’e iha relasaun di’ak durante tinan 11 nia laran duranta nia hala’o ninia mandatu hahú hosi tinan 2010 liu ba ne’e to’o ohin loron.

“Durante tinan 11 ha’u involve-aan hanesan Embaixadór Sahara iha Timor-leste. Ho ida-ne’e ha’u hakarak dehan ha’u-nia prezensa iha ne’e hetan apoiu hosi tipu oioin hanesan hetan apoiu hosi Prezidente Repúblika, Governu, no Ministériu Negósiu Estranjeiru no Kooperasaun (MNEK) no partidu politíku sira inklui sosiedade sivíl iha Timor-Leste,” Embaixadór Saharawi ne’e hateten.

Apoiu solidariedade hosi Governu no Estadu Timor-Leste hotu ne’ebé fó sira-nia solidaridade ba luta Saharawi nia mak hodi Sharawi hetan independénsia. Povu Timor-Leste fó oportunidade atu tane aas prinsípiu no valór no komprende kona-ba sofrementu luta ba hetan direitu tanba hanesan nasaun tenke fiar katak luta bele hetan buat hotu inklui hetan independénsia.

“Agora ha’u termina ha’u-nia misaun hanesan triste boot ida. Tanba, ha’u sente parte ida ona hosi povu Timor-Leste ida-ne’e, ne’ebé hanesan sentimentu povu ne’ebé hasoru esperiénsia oioin. Tanba, povu ida-ne’e bele garante valór no prinsípiu hodi levanta progressu hotu tantu ekonómia inklui dezastre naturál ne’ebé povu enfrenta ne’e,” nia dehan.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here