Pesoál aviasaun hatún hela Ekipamentu Protesaun Pesoál ne’ebé oferese hosi OMS ba MS, bainhira to’o iha Aeroportu internasionál Nicolau Lobato, Comoro, segunda (26/04/21). Imajen Tatoli/António Gonçalves.

DILI, 26 abríl 2021 (TATOLI)—Organizasaun Mundiál Saúde (OMS) oferese tan Ekipamentu Protesaun Pesoál (PPE) hamutuk item 50 ba Ministériu Saúde (MS).

Ekipamentu hirak-ne’e, OMS aluga aviaun My Jet express Airlines, hodi tula hamutuk ho sasán apoiu emerjénsia ba Minsitériu Saúde (MS) ho totál tonelada 1.325, ne’ebé transporta ona mai Timor-Leste (TL) to’o iha Aeroportu Internasionál Nicolau Lobato iha tuku 14:00 otl.

Notísia relevante:Xina kontinua apoia TL kombate Covid-19

“Montante orsamentu ba ekipamentu sira-ne’e besik millaun $1,’’ Reprezentante OMS iha TL, Arvind Mathur, hateten ba jornalista-sira iha Aeroportu Internasionál Nicolau Lobato, Comoro, segunda ne’e.

Iha fatin hanesan Minsitra Saúde, Odete Maria Freitas Belo, hateten Ministériu Saúde  simu apoiu hosi OMS tanba hafoin inundasaun iha 04 abríl, sasán barak hetan estragu.

“Ami agradese ba OMS tanba ita-nia aprovizionamentu-sira ne’e sei prosesa hela, maibé  ho parte parseiru-sira kontinua ajuda, hodi hein ita-nia prosesu-sira ne’ebé mak ita halo liu hosi Orsamentu Jerál Estadu,” nia hateten.

Ekipametu hirak-ne’e, hafoin hatún hosi aviaun, transposta kedan ba armazén Serbisu Autónomu Medikamentu no Ekipamentu Saúde (SAMES) Kampung Alor.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here