Administradór Postu Administrativu Metinaro, Munisípiu Dili, Fausto Soares Dias, simu vasina AstraZeneca doze dahuluk iha Administrasaun Postu Metinaro. Imajen/Espesiál

DILI, 23 abríl 2021 (TATOLI)- Ekipa liña frente (frontline) hamutuk na’in-61 simu vasinasaun AstraZeneca iha Postu Administrativu Metinaro, Munisípiu Dili, sesta ne’e.

“Ohin, ami halo lansamentu ba programa vasina AstraZeneca ne’e atu fó ezemplu ba ita-nia komunidade ne’ebé daudaun ne’e sei dúvida ba vasina AstraZeneca,” Administradór Postu Administrativu Metinaro, Fausto Soares Dias, informa ba Agência TATOLI liuhosi telefónika.

Nia hatutan, vasina AstraZeneca ne’ebé ohin lansa ne’e halo uluk ba ekipa liña frente hanesan pesoál saúde-sira, membru PNTL Eskuadra Postu Administrativu Metinaro, autoridade relijiozu, inklui xefe suku ho xefe aldeia-sira.

“Kona-ba vasina AstraZeneca iha pro no kontra tuir ida-idak nia interpretasaun, maibé ha’u nu’udár autoridade lokál nafatin husu ba komunidade hotu katak vasina ida-ne’e rasik nia iha vantajen ba ita-nia an iha situasaun pandemia COVID-19 hodi aumenta ita-nia sistema imunidade,” Fausto Soares Dias hateten.

Tuir esplikasaun hosi parte saúde katak bainhira ema simu vasina AstraZeneca iha dozes rua katak vasina dahuluk sei aumenta ema-nia imunidade sa’e ba 74% no vasina daruak ne’ebé sei simu hafoin faze dahuluk ne’e sei aumenta imunidade sa’e ba 82%. Nune’e, vasina dozes daruak tuir planu sei hala’o iha juñu 2021.

“Bainhira ita tuir vasina sei seguru hosi COVID-19 no bainhira ita seguru ona ita-nia família, viziñu no sosiedade tomak mós seguru hotu,” nia tenik.

Nia husu ba komunidade Postu Administrativu Metinaro atu labele dúvida ba programa vasina AstraZeneca, maibé kolabora ho parte saúde simu hotu vasina AstraZeneca nune’e imunidade forte bele kontra COVID-19.

Jornalista   : Arminda Fonseca

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here