Natar iha Atabae. Imajen TATOLI/António Gonçalves

DILI, 22 abríl 2021 (TATOLI)–Ministru Agrikultura Peska, Pedro Reis, informa, dezastre naturál ne’ebé akontese iha loron 04 abríl iha territóriu tomak kuaze estraga natar no irrigasaun boot.

“Inundasaun konsege estraga natar hamutuk 1.900 inklui irrigasaun boot ida iha Manufahi hanaran Karau Ulun, bazeia ba relatóriu  Diretór  Ministériu Agrikultura Peska, munisípiu Manufahi,” Ministru hateten ba Agência TATOLI, iha resintu Parlamentu Nasionál, kinta ne’e.

Tuir governante ne’e, maski hetan estragu maibé sei la hamate produsaun tinan ne’e tanba parte MAP halo ona kordenasaun ho autoridade kompetente.

“Sistema irrigasaun hetan estragu maibé la grave, ami mós halo ona koordenasaun ho Diretór Ministériu Agrikultura Peska, Prezidente Autoridade munisípiu, autoridade lokál no kompañia sira iha munisípiu sira no agora halo normalizasaun ba sedimentasaun sira iha sistema irrigasaun, atu nune’e bele normaliza fali bee hodi kanaliza ba natar sira,” nia akresenta.

Ministéru Agrikultura no Peska identifika ona irrigasaun ne’ebé hetan estragu kama’an, nune’e iha tempu badak sei prevee osan hodi bele rezolve.

Daudaun ne’e komunidade sira halo ona natar iha époka dahuluk, tanba ne’e produsaun rai-laran sei sa’e.

“Ami fiar tanba iha époka dahuluk, ita-nia agrikultór sira komesa kuda iha rai ne’ebé abandonadu, barak hahú sai área kultiva tanba ne’e maski natar barak maka hetan estragu foin daudaun maibé la fó impaktu ba produsaun,” nia hatutan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here