DILI, 22 abril 2021 (TATOLI)—Diretór Ezekutivu Asosiasaun Defisiénsia Timor-Leste (ADTL), Cesário da Silva, informa ADTL halo ona pedidu ba Ministériu Saúde (MS) atu Ema ho Defisiénsia (EhD) mós partisipa iha vasinasaun AstraZeneca.
“Dadaun ne’e, ami aselera ema ho defisiénsia atu partisipa hotu iha programa vasinasaun AstraZeneca. Entaun, ami-nia ekipa ADTL halo pedidu ba Diretora Jerál Ministériu Saúde nian, nune’e aban (23/04) ne’e, ema ho defisiénsia mós hetan vasina,” Cesário da Silva hateten ba Agência TATOLI, liuhosi telefónika, kinta ne’e.
Daudaun ne’e, sira-nia parte hein de’it resposta hosi Ministériu Saúde (MS) maibé pedidu ne’ebé sira relata ne’e, iha loron aban (sesta, 23/04) ne’e, EhD sira-ne’ebé servisu iha liña frente ne’e tenke hetan vasina tanba liña frente mós halo knaar iha terrenu diretamente ho ema barak.
“Ami-nia ekipa liña frente hamutuk ema na’in 30 mak aban sei simu vasina AstraZeneca. Maibé ami hein de’it, karik MS resposta ona mak aban realiza maibé karik seidauk iha resposta mak dala ruma seidauk bele realiza. Maibé antes ne’e EhD ema na’in-20-resin mós hetan ona vasina,” nia dehan.
Hosi Ema ho Defisiénsia (EhD) na’in-30 ne’e maihosi Fundasaun Ahisaun, Raes Hadomi Timor Oan (RHTO) inklui Ema ho Defisíensia (EhD) tilun nian, no EhD na’in-20-resin ne’ebé simu ona vasina AstraZeneca ne’e maihosi RHTO no EhD seluk iha Timor-Leste.
Tuir nian, vasinasaun AstraZeneca ne’e buat di’ak ida, tanba ne’e nia husu ba Ema ho Defisiénsia (EhD) sira tenke simu tanba halo prevensaun no haforsa imunidade ema ida-idak nian ba hasoru moras COVID-19 ne’e.
“Kazu moras COVID-19 kada loron aumenta makaas. Tanba ne’e, iha situasaun ida-ne’e, ita presiza halo vasinasaun AstraZeneca. Nune’e, ha’u husu atu ita hotu kontribui no tau konfiansa ba pesoál saúde sira no Organizasaun Mundiál Saúde (OMS), atu halo vasinasaun AstraZeneca hodi avansa ba oin,” nia dehan.
Jornalista: Osória Marques
Editór: Cancio Ximenes
