Imajen/Mídia PR.

DILI, 21 abril 2021 (TATOLI)—Gabinete de Apoio á Actividade do Cónjuge do Presidente Prezidénsia Repúblika (GAAC-PR), horisehik (tersa, 19/04), kontinua hala’o vizita hodi presta solidariedade Xefe Estadu nian liuhosi fó apoiu umanitáriu ba vítima dezastre naturál iha Komponente Naval Hera.

Notísia Relevante: Espoza PR fó apoiu nesesidade bázika ba vítima dezastre naturál

Espoza Prezidente Repúblika, Cidália Nobre Lopes Mouzinho Guterres, ho nia ekipa dezloka ba Komponente Naval Hera, lori nesesidade bázika hodi fó apoiu ba família FALINTIL-Forsa Defeza Timor-Leste (F-FDTL) uma-kain 98 ne’ebé afetadu ba inundasaun ne’ebé akontese iha domingu (04/04).

Hosi dezastre naturál ne’ebé akontese ne’e, bee-mota lori membru F-FDTL ida-nia oan ne’ebé to’o oras ne’e seidauk hetan. Espoza Prezidente hato’o sentidu kondolénsia ba membru F-FDTL ne’ebé lakon oan iha dezastre naturál tanba família halo tuir de’it lisan hodi bolu bebé ne’ebé lakon ne’e nia klamar.

“Agora todan liu ba ita mak ita-nia maun-alin ho família sira-ne’ebé lakon sira-nia membru família, balun bee lori, balun rai taka no mate, maibé balu to’o agora seidauk hetan. Hanesan membru F-FDTL ida-nia oan (bebé) to’o agora seidauk hetan. Situasaun ne’e mak akontese iha ita-nia rain tanba dezastre naturál,” Espoza Prezidente, Cidália Nobre Lopes Mouzinho Guterres, hateten liuhosi komunikadu imprensa ne’ebé Agência TATOLI asesu, kuarta ne’e.  

Hafoin vizita Komponente Naval, ekipa Gabinete Espoza Prezidente Repúblika kontinua dezloka ba iha aldeia Foslam, Suku Bairru Pite, hodi fó apoiu nesesidade bázika ba família afetada hamutuk uma-kain 65.

Aleinde ne’e, Espoza Xefe Estadu ho ekipa kontinua vizita ba Suku Manleuana hodi haree mós kondisaun vítima dezastre naturál uma kain 70-resin ne’ebé to’o agora obrigatoriumente sei hela iha lona okos.

“Ami mai lori apoiu naton de’it hodi apoiu ba ita-nia komunidade sira-nia nesesidade. Alende ne’e husu nafatin ba inan-aman sira atu kuidadu-aan no kuidadu labarik sira. Husu ba autoridade lokál sira atu aselera rekolla dadus hodi hato’o ba overnu sentál, atu nune’e bele tau iha planu emerjénsia,” Espoza PR hateten.

Xefe Suku Manleuana, Jacob Tilman, husu ba inan-nasaun atu tatoli netik ninia populasaun sira-nia terus no halerik ne’e ba aman-nasaun, tanba populasaun sira hela kleur demais iha lona okos ne’e bele afeta ba saúde.

“Ha’u husu ba Sua Exelénsia atu ita-nia komunidade sira iha lona okos, labele demora kleur liu tanba bele afeta ba sira-nia saúde, tanba sira-nia uma la aproveita. Balun hela ho roupa tahan ida iha sira-nia isin lolon ne’e de’it. Tanba ne’e, husu ba Sua Exelénsia hato’o ba na’i Prezidente Repúblika bele karik halais uitoan harii uma emerjénsia atu komunidade sira-ne’e bele hela bá,” Xefe suku ne’e hateten.

Autoridade lokál ne’e hatutan, inan-nasaun preokupa ho kondisaun vítima inundasaun ne’ebé oras ne’e dadaun toba de’it iha lona okos no autoriza ona sosiedade sivil, Prezidénsia Repúblika atu koordena ho autoridade lokál atu buka fatin temporáriu uma-eskola ida, nune’e komunidade afetadu hirak ne’e hodi hela temporáriu hodi hein apoiu définitivu hosi orgaun ezekutivu.

Ba inan isin-rua no labarik kiik tenke komunika beibeik ho responsavel no autoridade lokál sira, karik iha kazu moras ruma akontese ba família afetadu dezastre naturál, nune’e parte médiku bele fó tratamentu sáude.

Apoiu nesesidade bázika ne’ebé Gabinete Espoza Prezidente Republika fahe ba vítima sira iha Komponente Naval hera mak foos saka 60, Supermie kaixa 37, Mina kaixa 10, Energen kaixa 10, Sabaun kaixa lima (5), Masin kaixa haat (4), Pastadente no Eskova nehan nian kaixa hitu (7).

Distribuisaun nesesidade bázika ba Aldeia Fuslam, Suku Bairru Pite ne’e foos saka 60, Supermie kaixa 30, Mina kaixa 10, Energen kaixa 10, Rinso Daia kaixa 10, Sabaun kaixa haat (4), Masin kaixa haat (4).

Iha Manleuana, Gabinete Espoza Prezidente Repúblika ho ekipa distribui foos saka 60, Supermie kaixa 40, Mina kaixa 20, Energen kaixa 20, Masin kaixa haat (4), Pastadente no eskoba kaixa 11, no roupa-laran.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here