Reprezentante AEOS-PNTL, Manuela de Araújo, entrega sasán nesesidade bázika ba Komandante Munisípiu Dili (21/04/21). Imajen Tatoli/Eugénio Pereira.

DILI, 21 abríl 2021 (TATOLI)—Assosiasaun Espoza Ofisiál Superiór Polísia Nasionál Timor-Leste (AEOS-PNTL) oferese sasán nesesidade bázika, ba membru polísia na’in 20-resin ne’ebé afetadu ba dezastre naturál iha 04 abríl.

Reprezentante AEOS-PNTL, Manuela de Araújo, konsidera apoiu ne’ebé oferese ho valór ki’ik, maibé bele ajuda membru-sira atu labele lakon esperansa iha situasaun kalamidade.

Notísia relevante:SEPS apoia ona família 5.323 iha Dili

“Ami oferese oitoan hanesan foos, super mie no mina tein-nian ba membru-sira ne’ebé afetadu ba inundasaun,” Manuela de Araújo, hateten ba jornalista Agênsia Tatoli, iha Komandu PNTL, Caicoli, Dili, kuarta ne’e.

Nesesidade hirak-ne’e, balun AEOS-PNTL hetan hosi Grupu Tasi Timor Moos Ataúro no organizasaun seluk-tan.

Membru polísia afetadu na’in 20-resin ne’e mai hosi PNTL Munisípiu Dili, Unidade Espesiál Polísia (UEP), Unidade Polísia Maritima (UPM) no Komandu Jerál PNTL.

Iha fatin hanesan, Komandante PNTL Munisípiu Dili, Superintendente Xefe, Henrique da Costa  agradese ba apoiu domin ne’ebé oferese hosi AEOS-PNTL.

Superintendente Xefe Henrique rekoñese membru PNTL na’in 20-resin sai vítima ba inundasaun, hanesan uma hetan estragu tanba bee lori, balun bee tama uma hodi estraga sasán uma laran no balun rai hanehan uma.

“Ita-nia membru-sira ne’ebé hetan ajuda hamutuk na’in 20-resin, maibé tuir lista ne’ebé ami rejista iha na’in 80-resin mak sai vítima ba inundasaun,” Herique esplika.

Komandante ne’e promete sei kontinua esforsu atu buka apoiu hosi doadór-sira hodi tulun nafatin membru-sira ne’ebé seidauk hetan.

Tuir dadus hosi Sekretária Estadu Protesaun Sivíl (SEPS), to’o ohin, oferese ona apoiu emerjénsia ba família hamutuk 5.323 iha Munisípiu Dili, ne’ebé afetadu ba dezastre naturál.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here