Imajen/Media PR.

DILI, 20 abríl 2021 (TATOLI)—Parlamentu Nasionál (PN,) tersa ne’e, aprova ona proposta Orsamentu Retifikativu liuhosi alterasaun Orsamentu Jerál Estadu (OJE) 2021 iha faze jeneralidade.

Rezultadu votasaun ba proposta orsamentu retifikativu liuhosi alterasaun OJE 2021 aprova ho rezultadu votasaun 44, kontra 0 no abstensaun 21.

“Orsamentu jerál Estadu retifikativu aprovadu iha jeneralidade, tanba ne’e aban kontinua ba diskusaun iha espesialidade. Proposta-alterasaun tenke to’o iha oras 20.00, tenke submete mai meza, Prezidente Parlamentu Nasionál, Deputadu Aniceto Longuinhos Guterres Lopes, anúnsia liuhosi plenária, Parlamentu Nasionál.

Xefe Bankada FRETILIN, Deputadu Francisco Miranda Branco, hateten presiza halo avaliasaun ba kualidade infraestrutura iha dezenvolvimentu nasionál.

“Bankada FRETILIN fó apoia Governu hodi responde situasaun COVID-19 no kalamidade ne’ebé hamate ita-nia ema na’in-40 no oras ne’e família sira tutur lutu-metan tanba impaktu hosi kalamidade boot ne’ebé akontese iha loron 4 abríl,” Xefe Bankada FRETILIN akresenta.

Vise-Xefe Bankada CNRT, Deputadu Patrocínio Fernandes dos Reis, hateten proposta OR hamutuk millaun $223,8 ne’e, iha loron 30 marsu 2021, Governu submete ona ba iha Parlamentu Nasionál no Governu husu atu halo alterasaun.

“Governu halo alterasaun no ezersísiu ba OJE 2021 hamutuk millaun $89 no husu tán aumentu Miliaun $135,3 hodi nune’e OJE 2021 sei sa’e ba biliaun $2,030. Loloos ne’e Orsamentu Retifikativu laiha fatin tanba laiha kontribuisaun ba ekonomia, programa rekuperasaun ekonómika paradu totál no la kontribui ba kresimentu ekonómika,” Vise-Xefe Bankada CNRT hateten.

Bankada CNRT Haree hosi orsamentu orijinál 2021 ho montante biliaun $1,895, tetu mós kapasidade no dezempeñu ezekusaun real iha loron 19 Abril 2021 foin mak atinje 18.9% de’it. Hatudu katak Orsamentu Rektifikativu ida-ne’e laiha fatin atu diskute no aprova tanba Governu laiha duni kapasidade, satán hasoru hela situasaun Covid-19.

Vise-Xefe Bankada Partidu Libertasaun Populár (PLP), Deputadu Francisco de Vasconselos, OJE 2021 ne’e hanesan halo estimasaun liuhosi proposta-alterasaun.

“Ita agora iha situasaun delikadu tebes, hanesan surtu COVID-19 no dezastre naturál, oinsá ita hotu nia kontribuisaun ba situasaun kalamidade ne’ebé ita-nia sidadaun sira hasoru. Tanba ne’e laiha razaun dehan Orsamentu Retifikativu ne’e mai sedu liu. Tanba ne’e só parlamentu mak bele halo ajustamentu hodi hatán ba situasaun atuál,” Vise-Xefe Bankada PLP ne’e hateten.

Xefe Bankada Partidu Demokrátiku (PD), Deputadu António da Conceição, haktuir dezde 2018 to’o oras ne’e Bankada PD sempre apoia kualkér insiativa Governu nian.

VIII Governu Konstitusionál lideradu Primeiru Ministru (PM) Taur Matan Ruak, propoin montante orsamentu millaun $223,8 ne’ebé realokasaun verba hosi Fundu Infraestrutura ho valór millaun $62, realokasaun hosi verba Dotasaun Todo Governu ho montante millaun $26,5 no integrasaun saldu jerénsia ne’ebé la inskritu (não inscritos) iha OJE 2021 ho montante millaun $135,3.

Hosi montante orsamentu millaun $223,8 koloka ba kombate no halo prevensaun pandemia COVID-19 ho valór millaun $51,2, medida apoia sósiu-ekonómika millaun $81,7, finalizasaun pagamentu Cesta Bázika millaun $31, atribuisaun suplementu remuneratóriu ba traballadór liña frente millaun $51,9 no dotasaun kontinjénsia ba fundu COVID-19 millaun $8.

Proposta-lei ne’ebé prosede ba primeira alterasaun ba OJE 2021 artikulada ho artigu hamutuk 18 ne’ebé distribui ba kapítulu 4, anexu 1 ho tabela orsamentál 3.

Hafoin aprova iha jeneralidade, aban (kuarta, 21/04/2021),  kontinua debate faze espesialidade loron dahuluk nian tanba debate espesialidade durante loron neen (6) no termina iha 27 abríl 2021.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here