Fundus Nasoins Unidas ba Labarik (UNICEF, sigla Inglés) nia atividade blun iha Dili. Imajen/Espesiál

DILI, 20 abríl 2021 (TATOLI)– Nova Zelándia oferese  rihun $400 ba Fundus Nasoins Unidas ba Labarik (UNICEF, sigla Inglés) hodi hatán ba asaun multiplu emerjénsia nian iha Timor-Leste.

Anúnsiu ne’e fó sai ona iha Dili husi Embaixadór Nova Zelándia, Philip Hewitt no reprezentativu UNICEF, Bilal Aureng Zeb Durrani, bainhira sira vizita eskola EBF 12 Outubru iha Tasi-Tolu, ne’ebé mak oras ne’e akomoda família afetadu hosi inundasaun hamutuk liu 174.

“Nova Zelándia no UNICEF servisu hamutuk ona iha Timor-Leste hodi realiza labarik sira-nia direitu tinan hirak liubá, inklui estabelese ona uma pre-eskolár 104 mak benefisia ona labarik 3.000 iha Ermera no Viqueque, no apoia mós reabertura eskola sira iha tinan kotuk,” Philip Hewitt, Embaixadór Nova Zelándia iha Timor-Leste hateten liuhosi komunikadu imprensa ne’ebé Agência Tatoli asesu, tersa ne’e.

“Ne’e kontinuasaun husi foku sira ne’e, hodi garante labarik sira seguru no simu apoiu loloos durante pandemia COVID-19 no inundasaun daudaun ne’e.”

Fundu husi Governu Nova Zelándia bele ona ajuda UNICEF atu habelar nia asaun prevensaun hodi hatán ba COVID-19. Inklui provizaun apoiu psikolójika no asesu sira ba material edukasaun no ekipamentu ijiene sira ba labarik sira iha fasilidade dezlokasaun sira no kuarentena obrigatóriu, apoiu ba labarik sira iha fasilidade kuidadu rezidensiál iha área sira ne’ebé aplika hela serku sanitaria mak limita asesu ba edukasaun, no mós bee-moos, saneamentu no ijiene iha sentru saúde sira.

Fundu ne’e mós utiliza hodi hatán ba inundasaun, inklui apoia ba fatin ksolok ba labarik sira, oferese apoiu psikolójika no asesu ba atividade aprendizajen sira, no bee-moos, saneamentu no ekipamentu ijiene.

“Iha tinan kotuk, UNICEF oferese ona apoiu ba Governu Timor-Leste, ba prevensaun COVID-19 no mós hodi hatán ba inundasaun liubá ne’e mak aumenta presaun ba labarik sira, família sira no sistema hatán nasionál sira,” Bilal Durrani, reprezentativu UNICEF iha Timor-Leste haktuir.

Apoiu husi Nova Zelándia ne’e sei ajuda oferese apoiu umanitária ba labarik no família sira iha tempu kritiku ba país ne’e, bainhira ema rihun ba rihun kontinua hela iha fatin dezlokasaun tanba sira labele fila ba sira-nia uma mak afetadu husi inundasaun, no bainhira kazu COVID-19 hatudu númeru ida aumenta hela.

Governu Nova Zelándia mós apoia lámpada solar, ai-moruk purifikador bee, bomba bee, ekipamentu ijiene familiar, ekipamentu ba inan no bebé sira, jeradór no jerikán, ho UNICEF nia koordenasaun servisu ho Sekretáriu Estadu Protesaun Sivíl hodi fahe suprimentu sira ba sira ne’ebé nesesitadu liu.

UNICEF apoia hela ona Ministériu Saúde ba prevensaun COVID-19 no hatán ba esforsu sira, inklui konsientizasaun prevensaun COVID-19, apoiu suprimentu médiku sira, melloramentu prevensaun infesaun no kontrolu, apoia aprendizajen husi do’ok no protesaun ba labarik sira.

UNICEF mós hatama vasina COVID-19 aloka husi fasilidade COVAX no apoia implementasaun planu vasinasaun. UNICEF-nia hatán ba inundasaun inklui ona suprimentu bee, saneamentu no ijiene sira, no ajuda estabelese Sentru Ksolok ba Labarik sira, triajen nutrisionál no oportunidade aprendizajen ba labarik no família sira iha sentru dezlokasaun inundasaun no komunidade afetadu husi inundasaun.

Jornalista : Hortencio Sanchez

Editór      : Francisco Simões

HAKEREK NO HATÁN

Please enter your comment!
Please enter your name here