Estudante Eskola Sekundária Sentrál Liquiça partisipa ezame periodu dahuluk ba loron daruak nian, tersa (20/04/2021). Imajen Tatoli/Hortencio Sanchez

LIQUIÇA, 20 abríl 2021 (TATOLI) – Diretór Eskola Sekundária Sentrál Liquiça, António Oliveira Nunes, informa  maske Timor-Leste enfrenta hela situasaun pandemia COVID-19, maibé prosesu ezame períodu dahuluk, hahú segunda to’o tersa (19-20/04), la’o ho di’ak tebes.

Notísia Relevante : Liquiça selebra ezame trimestre dahuluk iha pandemia COVID-19

Diretór Eskola Sekundária Sentrál Liquiça, António Oliveira Nunes. Imajen Tatoli/Hortencio Sanchez

“Alunu-sira ohin ezame ba loron daruak ona, ezame iha pandemia COVID-19 nia laran ne’e entaun pontu ezame nian mak la normal ona hanesan tinan sira ba kotuk ne’e. Ami ba ko’alia ona ho Edukasaun Munisípiu atu redús uitoan pontu ezame nian tuir matéria ne’ebé alunu-sira simu maibé la dun kompletu,” António  Oliveira Nunes haktuir ba Agência Tatoli iha Liquiça, tersa ne’e.

Difikuldade hodi hatún pontu ezame ba alunu-sira ho razaun rua;  ida kona-ba pandemia Covid-19 halo alunu-sira simu matéria la kompletu no seluk fali maka orsamentu laiha atu prodús pontu ezame ba alunu-sira.

Haree ba situasaun pandemia COVID-19, maka eskola mós tenke kumpre ba padraun-sira saúde públiku nian,  hanesan ezame ba alunu-sira tenke kumpre distansiamentu sosiál,  nune’e kada aula alunu barak liu 25, uza máskara, fase-liman beibeik no seluk tan.

Total alunu ne’ebé daudauk ne’e tuir hela ezame iha eskola refere hamutuk na’in-1.820.

Iha fatin hanesan alunu Marsal Correia hateten,  nia triste tanba ezame ne’ebé sira tuir la normal tanba pandemia COVID-19.

“Ezame kada tinan ne’e ita sente ba di’ak uitoan,  maibé ho situasaun COVDO-19 ne’e halo ami simu matéria la kompletu no matéria ezame  uitoan loos,” Marsal Correia hateten. Maski nune’e nia nafatin iha esperansa atu tuir ezame ho di’ak no fiar katak sei hetan valor di’ak iha ezame ne’e.

Jornalista       : Hortencio Sanchez

Editór             : Francisco Simões

 

HAKEREK NO HATÁN

Please enter your comment!
Please enter your name here