Asosiasaun Komersiál Xinesa Timor-oan iha Timor-Leste, ohin, entrega apoiu umanitáriu ba Gabinete de Apoio á Actividade do Cónjuge do Presidente do Republica (GAAC-PR). Imajen Tatoli/Osória Marques.

DILI, 20 abril 2021 (TATOLI)—Asosiasaun Komersiál Xinesa Timor-oan (ACCT, sigla portugés) iha Timor-Leste, ohin, entrega apoiu umanitáriu ba Gabinete de Apoio á Actividade do Cónjuge do Presidente do Republica (GAAC-PR) iha Palásiu Prezidénsia, Bairru Pite, Dili.

Espoza Prezidente Repúblika, Cidália Nobre Lopes Mouzinho Guterres, hateten ACCT iha Australia-Sidney liuhosi ACCT iha Timor-Leste fó apoiu umanitáriu liuhosi Espoza Prezidente Repúblika atu tulun ba vítima dezastre naturál iha Timor-Leste.

“Agora ita sei ba fatin tolu hodi fahe apoiu umanitáriu ba afetadu dezastre naturál ne’ebé maluk Asosiasaun Komunidade Xineza Timor-oan iha Australia-Sidney ne’ebé oferese mai ita. Ita fahe ba fatin tolu mak Hera, Manleuana no Mota Ulun,” Espoza Prezidente Repúblika, Cidália Nobre Lopes Mouzinho Guterres, hateten ba jornalista sira bainhira iha serimónia entrega apoiu umanitáriu hosi ACCT, iha Palásiu Prezidensiál Nicolau Lobato, Bairru Pite, Dili, tersa ne’e.

Imajen Tatoli/Osória Marques.

Apoiu umanitáriu ne’e sei fó apoiu ba vítima dezastre naturál ne’ebé afetadu ba inundasaun, ne’ebé refujia iha sentru evakuasaun iha Hera ho xefe família hamutuk 200, Manleuana iha uma kain 80 no iha Mota Ulun-Becora ne’e iha xefe família hamutuk 600.

Iha biban ne’e, Espoza PR agradese ba Asosiasaun Komersiál Xinesa Timor-oan ho nia ekipa ne’ebé fó ona apoiu umanitáriu ba Gabinete Prezidente Repúblika hodi fó tulun ba vítima dezastre naturál liuliu ba família sira-ne’ebé afetadu ba inundasaun.

Prezidente Asosiasaun Komersiál Xineza Timor-oan iha Timor-Leste, Kethleen Gonçalves, hateten Asosiasaun Xineza Timor-oan ohin entrega no fó apoiu umanitáriu ba vítima afetadu dezastre naturál liuhosi Gabinete Espoza Prezidente Repúblika.

“Doativu ne’ebé maihusi ita-nia maluk Timor-oan ne’ebé moris iha Timor-Leste no hela iha Australia Sidney husu Asosiasaun Komersiál Xineza Timor-oan (ACCT) entrega apoiu bázika hanesan supermie dos 150 no foos saku 125,” nia hateten.

Daudaun ne’e, nia dehan, iha organizasaun haat mak hamutuk hodi apoiu umanitáriu mak Asosiasaun Xineza Timor-oan iha Sidney, Melbourne, Vitoria no Asosiasaun Xineza Timor-oan ferik-katuas nian ne’ebé entrega ona ai-han bázika mai Timor-Leste liuhosi ACCT ba família afetadu dezastre naturál nian.

Asosiasaun Xineza hirak ne’e, fó apoiu no oferese ona foos hamutuk saka 1.250, supermie dos 600, bee dos 300 no mina dos 50 ba Governu liuhosi liuhosi Sekretáriu Estadu Protesaun Sivíl (SEPS), Fundasaun Quesadhip Taur Matan Ruak, no seluk tán tuir rekomendasaun ka lista ne’ebé sira fó ona ba ACCT antes ne’e.

Antes ne’e, Prezidente ACCT ne’e mós fó ona apoiu nesesidade bázika ba vítima afetadu inundasaun ne’ebé refujia iha sentru evakuasaun iha igreja Becuse, Madre sira iha Hera, João Paulo II Tasi-Tolu, Aitarak-Laran, Manleuana no fatin seluk tan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here