DILI, 19 abríl 2021 (TATOLI)-Koordenadór Sentru Evakuasaun vítima dezastre naturál iha Instituto Nacional de Formação de Docentes e Professioniais da Educação de Timor-Leste (INFORDEPE), João do Rego, informa vítima dezastre naturál, ne’ebé evakua ba sentru INFORDEPE hamutuk uma-kain-70.
Notísia Relevante : Vítima dezastre naturál iha Temporál hetan apoiu hosi MTVCC
“Dezde loron 04 abríl ne’e, hamutuk uma-kain 112 maka evakua ba INFORDEPE tanba dezastre naturál, maibé agora balun fila ona no sei hela uma-kain-70,” João do Rego, informa ba Agência TATOLI iha INFODEPE, Balide, Dili, segunda ne’e.
Kona-ba atendimentu hahán ba vítima-sira iha sentru evakuasaun INFORDEPE, João do Rego, hateten vítima-sira tama foufoun hosi Ministériu Solidariedade Sosiál no Inkluzaun (MSSI) mak mai te’in ba vítima-sira durante loron haat ka lima. Maibé liu tiha ida-ne’e Governu entrega ba responsavel atu halo dapur ba vítima-sira, maibé ema atu organiza ba dapur ne’e laiha entaun apoiu sira ne’ebé mai hosi NGO sira define kedas ba vítima sira mak ida-idak te’in ninian.
“Difikuldade ita hasoru mak kona-ba ai-han tanba besik semana rua ona Governu seidauk apoiu tan nesesidade báziku ruma, no Xineza-sira mak mai fó apoiu ai-han ba vítima sira no daudaun ne’e loron tolu ona hosi NGO Fundasaun Alola, UNICEF hamutuk ho Saúde mak mai te’in ba vítima sira, maibé ba oin mak Governu la ajuda nafatin ne’e arraska, tanba vítima sira balu família barak entaun hahán la to’o,” nia hateten.
Responsavel ba sentru evakuasaun INFORDEPE ne’e dehan, haree ba vítima-sira hahú hasuru difikuldade ba hahán ba oin sei fó avizu ba vítima-sira nune’e ida ne’ebé uma grave liu mak provizóriu hela lai iha sentru evakuasaun INFORDEPE, maibé balun ne’ebé uma estraga natoon bele ba hadi’a uma hela fila-fali.
“Ita labele fó sala ba Governu tanba ita mós hatene katak sentru evakuasaun ba vítima dezastre naturál ne’e la’ós ida de’it, maibé barak entaun Governu atu haree hotu dala ida de’it mós susar uitoan,” nia tenik.
Nia husu ba Governu tau matan ba vítima-sira ne’ebé uma ladún grave, atu nune’e, sira bele fila-fali ba sira-nia uma mak Governu tau matan fali ba sira ne’ebé uma hetan estragu totál hosi inundasaun.
Kona-ba saúde públiku ba labarik sira, nia dehan, dezde vítima-sira evakua ba sentru evakuasaun iha INFORDEPE parte saúde sira Vera Cruz ba fó konsulta diretamente ba vítima sira liuliu ba labarik ki’ik sira.
Nia hatuan, moras sira ne’ebé hosi ekipa saúde-sira deteta ho númeru aas ne’e mak hanesan, fisur tanba labarik sira han arbiru de’it, isin-manas, maibé daudaun ne’e kondisaun la’o di’ak no rekupera hotu ona.
Vítima sira ne’ebé daudaun ne’e iha sentru evakuasaun INFORDEPE mai hosi Aldeia 01 Mascarinhas, Colmera, Vila-Verde, Caicoli, maibé barak liu ne’e hosi área Balide nian.
Notísia Relevante : SEPS distribui nesesidade bázika ba vítima dezastre naturál iha Tasi-Tolu
Jornalista : Arminda Fonseca
Editór : Francisco Simões
