Ekipa saúde PNTL ho pesoál saúde hosi Ministéiru Saúde (MS) hala’o atendimentu vasinasaun ba membru PNTL iha Komandu Jerál, Caicoli, Dili, segunda (19/04/21). Imajen Tatoli/Nelson Sousa.

DILI, 19 abríl 2021 (TATOLI)—Membru Polísia Nasionál Timor-Leste (PNTL) iha territóriu tomak, hamutuk 4.000-resin, hosi númeru ne’e iha 70% mak simu ona vasina AstraZeneca.

“Prosesu vasina iha Komandu Jerál PNTL, liu-liu iha Dili no Munisípiu sira la’o ona iha semana kotuk. Membru efetivu iha territóriu hamutuk 4.000-resin no 70% mak simu ona,” Porta Voz Komandu Jerál PNTL, Superintendente Xefe, Arnaldo Araújo, hateten ba jornalista-sira iha Caicoli, Dili, segunda ne’e.

Notísia relevante:Funsionáriu PN-deputadu sira simu vasina Astrazeneca

Tuir dadus, membru PNTL iha Munisípiu-sira kuaze simu hotu ona vasina no oras ne’e daudaun médiku-sira kontinua hala’o vasina ba membru-sira iha Munisípiu Dili.

“Maski la’ós obrigatóriu, maibé husu ba membru-sira ne’ebé seidauk vasina bele vasina, tanba PNTL nu’udár ekipa liña frente, hasoru direta komunidade iha situasaun COVID-19,” Superintendente Xefe, Arnaldo Araújo apela.

Tuir observasaun Agência Tatoli, ekipa saúde PNTL ho pesoál saúde hosi Ministéiru Saúde (MS) kontinua halo atendimentu vasinasaun ba membru PNTL iha Komandu Jerál, Caicoli, Dili, segunda ne’e.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here