Ministru Administrasaun Estatál, Miguel Pereira de Carvalho hamutuk ho Reprezentante Rezidente UNDP iha Timor-Leste, Munkhtuya Altangerel UNDP ho MAE asina dokumentu projetu kona-ba COVID ba eleisaun rezi;iente iha Timor-Leste Timor-Leste (CORE-TL), iha Caicoli. segunda (19/04). Imajen Tatoli/Egas Cristóvão.

DILI, 19 abríl 2021 (TATOLI)—Governu liuhosi Ministeriu Administrsaun Estatál (MAE) ho United Nations Development Programm (UNDP), ohin, asina dokumentu projetu eleisaun reziliente (resilient election) ba COVID-19 iha Timor-Leste.

“Ohin, ita halo asina dokumentu ho UNDP ba projetu eleisaun reziliente ba COVID-19 iha Timor-Leste. Projetu ida-ne’e ho nia durasaun tinan rua ho orsamentu tokon $4.3. Hosi orsamentu $4.3 ne’e, Governu Japaun kontribui tokon $4 no Governu Timor-Leste rihun $300,” Ministru Administrasaun Estatál, Miguel de Carvalho Pereira, hateten ba jornalista sira hafoin asina dokumentu projetu ho UNDP iha salaun VIP MAE, Colmera, Dili, segunda ne’e.

Osan hirak ne’e, nia hatutan, atu fó apoiu ba órgaun administrasaun eleitorál rua hanesan Sekretariadu Tékniku Administrasaun Eleitorál (STAE, sigla portugés) ho Komisaun Nasionál ba Eleisaun (CNE, sigla portugés) hodi halo preparasaun ba konstrusaun edifísiu sira atu hasoru eleisaun prezidensiál iha tinan 2022.

“Ho projetu ida-ne’e, ita tenta para reforsa kapasidade  órgaun eleitorál rua ne’e liuhosi atu halo konstrusaun edifísiu tolu ba STAE no mós tolu ba CNE nian. Maibé edifísiu ne’e sei kompletu ho fasilidade ne’ebé mak reziliente ba moras COVID-19 ne’e. Katak, edifísiu hirak ne’e sei garante ho kondisaun ne’ebé di’ak bainhira ema ba tuir eleisaun reziliente,” nia dehan.

Membru Governu ne’e hateten, konstrusaun edifísiu ba órgaun eleitorál rua ne’e sei konstrui iha munisípiu neen hanesan Munisípiu Aileu rua (2), Covalima ida (1), Viqueque ida (1), Baucau ida (1) no Munisípiu Manatuto ida (1).

Tuir nia, programa ne’e hanesan mós halo senibilizasaun ba eleitór sira katak aban bainrua tuir eleisaun karik, tenke kuidadu-aan para tempu eleisaun ne’e kontinua bele hadook-aan hosi moras COVID-19. 

Maske populasaun Timor-Leste simu ona vasina AstraZeneca maibé moras ne’e sei la lakon tanba vasina ne’e atu aumenta ema-nia imunidade de’it.

Ho projetu ne’e, tenta para órgaun eleitorál rua ne’e konitnua informa ba públiku katak bainhira hakat ba eleisaun prezidensiál tenke halo prevensaun ba ida-idak ninia aan hosi moras ne’e.

Tinan ida-ne’e, nia dehan, hosi projetu ne’e sei konstrui edifísiu lima ba STAE maibé edifísiu tolu ne’e finansia hosi projetu ne’e rasik no rua seluk finansia hosi Programa Dezenvovimentu Integradu Munisípiu (PDIM) nian. 

Liuhosi projetu ida-ne’e, Governu Timor-Leste kontribui osan rihun $300, atu UNDP liuhosi nia sistema aprovizionamentu hodi sosa tinta eleisaun no mós hala’o programa edukasaun eleitorál ba eleisaun prezidensiál iha tinan 2022.

Hafoin asina dokumentu ne’e, governenate ne’e hato’o agradesimentu ba Nasaun Unida liuhosi programa UNDP ne’ebé mak durante ne’e fó apoiu ba Governu Timor-Leste, no agradese ba Governu Japaun tanba fó apoiu no kontribuisaun kona-ba eleisaun nian ba Governu Timor-Leste dezde tinan 1999 to’o agora.

Marka prezensa iha serimónia asinatura ne’e mak Ministru Administrasaun Estatál Miguel Pereira de Carvalho, Enkaregadu Asuntus Embaixada  Japaun Hirashima Shusaku, Reprezentante Rezidente  PNUD Munkhtuya Altangerel, Prezidente  Komisaun Nasionál Eleisaun (CNE, sigla portugés) Alcino Araújo Barris no  Diretór Jerál STAE, Acilino Manuel Branco.

Jornalista: Osória Marques

Editór: Cancio Ximenes  

HAKEREK NO HATÁN

Please enter your comment!
Please enter your name here