Traballadór EDTL halo instalasaun fiu eletrisidade iha área Comoro, kinta (04/03). Imajen TATOLI/António Gonçalves

DILI, 19 abríl 2021 (TATOLI)Eletrisidade de Timor-Leste, Empreza Públika (EDTL, E.P) mobiliza ona ekipamentu atu normaliza hikas liña eletrisidade iha área Loes, suku Vatuboru, postu administrativu Maubara, munisípiu Liquiçá, ne’ebé ahi mate kuaze semana rua ona tanba inundasaun iha domingu (04/04) konsege estraga infraestrutura.

Prezidente EDTL, Paulo da Silva, hateten, ekipa tékniku sira mobiliza ona materiál sira bá Loes hodi hadi’a hikas eletrisidade, nune’e komunidade bele asesu eletrisidade.

“Ohin ami-nia tékniku sira mobiliza ona materiál hotu hodi normaliza hikas,” Prezidente empreza estatál ne’e hateten ba Agência TATOLI, iha salaun Ministériu Finansa, Aitarak-laran, segunda ne’e.

Notísia relevante: Eletrisidade iha Loes la lakan semana rua ona

EDTL rekoñese komunidade iha área refere kuaze semana rua la asesu liña eletrisidade tanba estragu maka’as liu no presiza ekipa téknika halo intervensaun, nune’e hahú aban (20/04) konsentra iha área Loes hodi hadi’a no ahi bele lakan normál.

“Ita-nia tékniku EDTL iha Liquiçá no Maliana haree, maibé laiha kondisaun atu halo servisu, enkuantu tékniku sira iha Dili mós espalla iha fatin barak hodi normaliza eletrisidade hahú loron 04 abríl to’o agora, ne’ebé ita-nia ema la to’o atubele atende lalais,” nia akresenta.

Nune’e, Resposavél ne’e espera iha tempu badak tékniku sira bele rezolve eletrisidade.

“Husu komunidade pasiénsia, maibé ita iha esperansa loron tolu ka haat komunidade bele asesu enerjia eletrisidade,” nia hatutan.

Uma-kain 100-resin iha Loes mak seidauk asesu eletrisidade tanba kauza udan ho intensidade boot no provoka inundasaun kuaze territóriu tomak inklui Dili, ne’ebé hetan impkatu maka’as halo infraestrutura públiku no privadu barak mak hetan estragu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here