Xefe Suku Lacu-Mesak, Filomeno Rodrigues Pereira Cárceres. Imajen Tatoli/Arminda Fonseca

MANATUTO, 15 abríl 2021 (TATOLI)-Xefe Suku Lacu-Mesak, Postu Administrativu Laclo, Munisípiu Manatuto, Filomeno Rodrigues Pereira Cárceres, husu ba Governu liuhosi Ministériu Obras Públiku (MOP) atu apoiu ekipa pezadu rua ba Postu Administrativu Laclo atu bele hasai sedimentasaun no normaliza  Mota Laclo.

Inundasaun iha loron rua; 03-04 abríl, foin lalais ne’e, rezulta mós estragu lubuk ida iha Laclo, inklui natar ho kintál komunidade nian ektare 832.

Notísia Relevante : Dezastre naturál Laclo, na’in-haat seidauk hetan

“Ami husu eskavadora rua mai Laclo atu apoiu ami normaliza Mota Laclo ne’ebé daudaun ne’e estraga hotu komunidade nia natar no to’os,” Xefe Suku Laco-Mesak, Filomeno Rodrigues Pereira, informa ba jornalista sira iha Salaun Vicente Perrer Laco, kinta (15/04).

Tuir nia haree katak tenke iha duni intervensaun urjente atu bele normaliza Mota Laclo, atu bele asegura komunidade nia natar ho kintál  sira.  tanba dezastre naturál, foin lalais ne’e, alein estraga komunidade nia kintál  no natar, estraga mós Grupu Juventude Laclo-oan ne’ebé hakiak ikan kolam hamutuk 60.

“Kona-ba animál boot hanesan karau luhan neen mak mota lori hotu no animál ki’ik ami la sura,” nia  informa.

Administradór Postu Administrativu Laclo, Samuel Rodrigues Pereira. Imajen Tatoli/Arminda Fonseca

Biban ne’e, Administradór Postu Administrativu Laclo, Samuel Rodrigues Pereira informa, iha Postu Administrativu Laclo aleinde mota estraga komunidade nian uma ho natar, mas  estraga mós infraestrutura hanesan irrigasaun, moru protesaun iha mota, inklui mós bronjong  ne’ebé foin konstrui iha tinan kotuk.

Nia hatutan, estrada ho distánsia kilómetru 17 ligasaun Obrato mai Laclo amesadu atu kotu  tanba ne’e presiza duni intervensaun emerjénsia.

Iha akontesimentu dezastre naturál ne’e, rezulta mós Laclo-oan na’in-10 lakon, maibé konsege hetan fali na’in-haat ho kondisaun moris, maibé nain-neen lakon vida.

Ministru Justisa, Manuel da Costa Cárceres  nu’udár Manatuto-oan, sei hato’o rekomendasaun komunidade Laclo nian ba Ministériu Obras Públiku atu ajuda ekipa pezadu ba normaliza Mota Laclo

“Ha’u sei ko’alia Ministru Obras públiku husu apoiu ekipa pezadu atu mai normaliza tiha mota Laclo. Atu nune’e bele salva komunidade nia natar no kintál-sira,” Ministru Manuel Cárceres hateten.

Tuir nia haree bainhira Obras Públiku haruka ona ekipa pezadu mai iha Laclo, la’ós de’it ajuda ona iha área agrikultór, maibé sei ajuda tebes mós komunidade iha Postu Administrativu Laclo tomak.

 Jornalista : Arminda Fonseca

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here