Primeiru-Ministru, Taur Matan Ruak. Imajen TATOLI/Egas Cristóvão

DILI, 15 abril 2021 (TATOLI)—Primeiru-Ministru, Taur Matan Ruak, ohin, informa ba Prezidente Repúblika Francisco Guterres Lú Olo katak família 25.709 mak afetadu ba dezastre naturál tanba konsikuénsia hosi inundasaun ne’ebé estraga sasán inklui ema lakon vida.

“Ohin, ami informa ba Prezidente Repúblika kona-ba dezastre naturál ne’ebé halo timor-oan barak mak terus. To’o ohin, ita iha família 25.709 mak afetadu. Ne’e primeira vez que família barak hetan hanesan ne’e,” Xefe Governu hateten ba jornalista sira hafoin hasoru Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pité, Dili, ohin.

Primeiru-Ministru hatutan, iha Munisípiu Dili família afetadu hamutuk 11.035 no seidauk haree ida-ne’ebé mak afeta makaas liu, natón no kiik liu. Espera katak iha tempu badak bele idenfika para define polítika hodi fó asisténsia ba sidadaun sira.

Sidadaun afetadu sira-ne’e agora daudaun hela iha fatin evakuasaun hamutuk 38 iha Dili no sidadaun afetadu balun hamoos ona sira-nia uma no balun seidauk ne’e, sai hanesan preokupasaun ba Governu

Aleinde ne’e, Xefe Governu informa to’o iha loron horisehik (kuarta, 04/04/2021) ne’e, tuir dadus haktuir Timor-Leste iha ema na’in 37 mak mate no na’in-sia (9) mak lakon to’o agora seidauk hetan.

Dezastre naturál ne’e la’ós estraga de’it aset, bens, no properidade sidadaun sira-nian maibé estraga mós infraestrutura Estadu nian.

“Ami ohin informa ba Prezidente Repúblika katak planu rekonstrusaun ba de’it dezastre naturál ne’e seidauk konkluzivu. Katak, nia bele aumenta no bele tun fali, maibé tuir kustu avaliasaun jerál kuaze millaun $225. Tanba Mota Comoro, bronjong no estrada lakon lakon no tún ba tasi. Ita ba haree Mota Maloa, Becuse, Becora, Loes no Tasi-Tolu, inudasaun halo ema-nia uma barak bee sa’e no rai hakoi ema-nia uma. Ida-ne’e dimensaun ida boot ne’ebé provavelmente, primeira vez iha istória Timor depois tinan 20 ukun aan, iha destruisaun boot ida hanesan ne’e,” Xefe Governu ne’e hateten.

Kombate COVID-19

Aleinde ne’e, asuntu seluk ne’ebé Primeiru-Ministru informa ba Prezidente Repúblika mak kombate COVID-19 tanba iha Timor-Leste númeru kazu pozitivu COVID-19 aumenta kada loron. Tanba ne’e mak liuhosi reuniaun Konsellu Ministru, kuarta (14/04) ne’e, aprova hodi implementa serka sanitaria ba Munisípiu Ermera, Ainaro, no Munisípiu Covalima.

“Konfinamentu obrigatóriu mak ami suspende maibé implementa nafatin serka sanitaria. Serka sanitaria ne’e, signifika katak ema hosi Dili ba karik Ermera, nia tenke teste swab mak nia ba, tanba nia labele sai ba fatin ida sein teste,” Xefe Governu ne’e hateten.

Atu kombate COVID-19, Governu iha esforsu ba progarama vasinasaun COVID-19 tanba Timor-Leste simu ona primeiru vasina iha 24 mil no hahú ona halo vasinasaun. Xefe Governu halo pedidu ba Primeiru-Ministru Austrália no Australia fó resposta pozitivu atu fó apoiu nafatin.

“Ita mantein regra no ita mós simu vasina tanba ita-nia objetivu to’o iha 2021 ramata, polpulasaun tenke vasina hotu. Ne’e, ita-nia ambisaun,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here