Administradór Covalima, Francisco de Andrade Imajen/Espesiál.

DILI, 14 abril 2021 (TATOLI)—Administradór Munisípiu Covalima, Francisco de Andrade, informa dadus provizóriu ne’ebé daudaun ne’e Administrasaun Munisípál rekolla hamutuk uma kain 62 mak afetadu ba dezastre naturál ne’ebé akontese iha domingu (04/04/2021) foin lalais ne’e.

“Agora daudaun vítima afetadu ba dezastre naturál ne’e hamutuk uma kain 62. Entaun hosi númeru ne’e, iha uma kain 11 mak uma hetan estraga totál, uma-kain neen (6) mak anin sobu sira-nia uma no uma-kain 47 mak bee tama sira-nia uma,” Francisco de Andrade hateten ba Agência TATOLI liuhosi telefónika, kuarta ne’e.

Hosi dadus uma kain 62 ne’ebé afetadu ba inundasaun ne’e, nia esplika, ne’e hanesan dadus provizóriu hela tanba hori bainrua mak Administrasaun Munisipál foin simu formatu hosi Ministériu Administrasaun Estatál (MAE) kona-ba atu halo levantamentu dadus ba vítima dezastre naturál.

“Ami foin simu formatu atu halo levantamentu dadus ba vítima sira iha Munisípiu Covalima foin hori bainrua ne’e. Entaun, ohin, formatu sira ne’e ita foin fahe ba Xefe Suku sira atu halo levantamentu dadus ba vítima dezastre naturál sira. Ne’ebé daudaun ne’e seidauk iha dadaus finál,” nia informa.

Nia dehan, bainhira akontese dezastre naturál ne’e, iha loron tuir mai nia parte ho Cruz Vermelha Timor-Leste ne’ebé deskaka iha Munisípiu Covalima to’o kedas iha fatin akontesimentu hodi fó apoiu emerjénsia ba vítima sira.

“Bainhira akontese inundasaun ha’u rasik ho Cruz Vermeilha Timor-Leste ne’ebé destaka iha Munisípiu Covalima, no hamutuk ho Protesaun Sivíl munisípiu nian ami tun kedas ba terrenu fó kedas apoiu emerjénsia hodi fahe nesesidade báziku hanesan foos, mina, Mie Sedaap ba ita-nia vítima sira,” nia dehan.

Nia argumenta, vítima dezastre naturál hamutuk uma kain 11 ne’ebé uma hetan estraga totál ne’e, daudaun ne’e hela provizóriu ho família no vítima sira seluk ne’e hela fali ona iha sira-nia uma.

Nia informa, eleinde komunidade afeta ba inundasaun, iha Postu Administrativu Zumalai, Suku Rai Mean mós, bee sa’e afeta joven mane ida Lafaek tata no labarik kiik ida lakon vida tanba mota lori.

“Mate isin, sira-nain foti kedas no serimónia funebre mós hala’o hotu ona. No ida joven lafaek tata ne’e mós daudaun ne’e kondsaun atu di’ak ona,” nia dehan.

Jornalista: Arminda Fonseca 

Editór: Cancio Ximenes

HAKEREK NO HATÁN

Please enter your comment!
Please enter your name here