Administradór Munisípiu Liquiça, Domingos da Conceição dos Santos, simu vasina AstraZeneca, kuarta (14/4). Imajen Tatoli/Hortencio Sanchez

LIQUIÇA, 14 abríl 2021 (TATOLI) – Ekipa médiku Liquiça halo ona vasinasaun ba ekipa liña frente COVID-19 iha Munisípiu Liquiça hamutuk ema 10-resin ho vasina AstraZeneca.

“Ami-nia alvu ohin loron nian halai liubá liña frente sira hanesan médiku no forsa ajente administrasaun públiku iha instituisaun Governu nian iha Liquiça,” Xefe Sentru Saúde Liquiça nu’udar mós responsavel másimu ba vasinasaun iha Liquiça, Beatris Filomena dos Santos, hateten  ba Agência Tatoli iha Ospitál Liquiça, kuarta ne’e.

Nia informa, iha etapa segundu sei foku liubá ema ne’ebé idade 60 ba leten no etapa terseiru foin foku ba komunidade jerál iha Liquiça tomak.

“Vasinasaun agora mai ne’e foin 20%. Entaun ida-ne’e hotu ona mak 80% tuir fali mai,” nia hateten.

Administradór Munisípiu Liquiça ne’ebé hanesan mós Prezidente Taskforce Prevensaun COVID-19 iha Liquiça, Domingos da Conceição dos Santos, simu mós vasina AstraZeneca ne’e.

“Primeiru, ha’u ema ida ne’ebé ta’uk loos vasinasaun ne’e tanba ha’u asiste iha media sosiál ne’e halo ha’u trauma, maibé ho ha’u nia pensamentu rasik imposivel nasaun ne’e atu oho fali nia povu rasik. Entaun, ohin ha’u mak númeru primeiru iha Liquiça simu vasinasaun,”  Domingos da Conceição dos Santos hateten.

Nia husu ba komunidade Liquiça hotu labele rona demais rumoris hosi ema no media sosiál, nune’e bele koopera ho médiku sira atu hetan vasinasaun AstraZeneca.

“Vasina ne’e di’ak bainhira ha’u simu sente di’ak normal hela, ne’ebé ita labele ta’uk demais,”  nia tenik.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here