Aviaun Citilink ne’ebé Governu Xineza aluga hodi tula materiál medikál, to’o iha Aeroportu Internasionál Nicolau Lobato, kuarta (14/04/21). Imajen Tatoli/Felicidade Ximenes.

DILI, 14 abríl 2021 (TATOLI)—Governu Xineza oferese tan materiál medikál hanesan Ekipamentu Protesaun Pesoál (PPE) no seluk tan, ba Ministériu Saúde (MS), ne’ebé tula ho aviaun Citilink to’o iha Aeroportu Internasionál Nicolau Lobato, iha tuku 16:00 otl.

Embaixadór Xina iha Timor-Leste (TL), Xiao Jianguo, iha serimónia entrega, hateten doasaun  kona-bá fornesimentu materiál  medikál ne’e ba dala-12.

Notísia relevante:Xina kontinua apoia TL kombate Covid-19

“Ekipamentu hirak-ne’e prodúz iha Xina mak hanesan, thermo scanner nomós ekipamentu balun ba Laboratóriu Nasionál Saúde (LABNAS) hodi halo diagnóstiku,’’ Xiao Jianguo hateten.

Iha fatin hanesan, Vise-Ministru Saúde, Bonifácio ‘Maucoli’ dos Reis agradese ba Governu Xineza ne’ebé oferese tan ekipamentu hodi tulun di’ak liu-tan nasaun ne’e, iha luta kombate COVID-19.

“Ohin ita simu doasaun hosi Governu Xineza ne’ebé bele apoia tan ita, liuliu ekipamentu prevensaun COVID-19,’’ Bonifácio ‘Maucoli’ dos Reis hateten.

Ekipamentu hirak-ne’e Ministériu Saúde asegura hela iha edifísiu serbisu Alfándega, no sei tau iha armazén Serbisu Autónomu Medikamentu no Ekipamentu Saúde (SAMES), Kampung Alor.

Ohin mós aviaun Citilink ne’ebé aluga hosi Governu Xineza hodi tula ekipamentu hirak ne’e, tula mós Xineza hamutuk na’in 100-resin, ne’ebé serbisu iha Portu  Tibar no sei submete ba kuarentena durante  loron 14.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here