Abitante iha mota-ibun Ponte Comoro III kona impaktu inundasaun iha domingu (04/04). Imajen TATOLI/António Gonçalves

DILI, 14 abríl 2021 (TATOLI)–Governu liuhosi Sekretaria Estadu Protesaun Sivíl (SEPS) halo levantamentu dadus, ne’ebé rejista ona ema hamutuk na’in-35 mak lakon vida durante dezastre naturál ne’ebé akontese iha loron 04 abríl no na’in-10 mak seidauk hetan isin.

Ministru Administrasaun Estatál, Miguel Pereira de Carvalho no Sekretáriu Estadu Protesaun Sivíl, Joaquim José Gusmão dos Reis Martins, halo ona aprezentasaun iha reuniaun Konsellu Ministru kona-ba pontu situasaun impaktu inundasaun iha loron 04 abríl 2021, ne’ebé provoka hosi Siklone Tropikál Seroja inklui aprezenta mós medida apoiu ne’ebé implementa ona.

“Tuir dadus ne’ebé aprezenta, inundasaun provoka ema mate hamutuk 35, kompostu hosi na’in-20 iha Dili, neen iha Ainaro, tolu iha Viqueque, rua iha Covalima, rua iha Manatuto, ida iha Aileu no ida iha Baucau. Enkuantu, na’in-10 maka lakon kompostu hosi na’in-haat iha Ainaro, haat iha Manatuto no rua iha Dili,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha Palásiu Governu, kuarta ne’e.

Família 25.000 maka afeta inundasaun no hela-fatin 4.546 maka a’at durante dezastre naturál.

To’o loron 11 abríl, Governu apoiu ona família hamutuk 1.396, no seluk planeia no realiza hela to’o loron 18 abríl hodi fahe ba família sira seluk.

“Entrega ona apoiu iha munisípiu Manatuto no iha kinta ne’e sei entrega apoiu sira iha Viqueque, Ermera no Aileu,” Portavós Governu informa.

Enkuantu, iha nível infraestrutura públika sira estrada 22 no ponte 11 mak estraga.

Iha Dili, daudaun ne’e ema 11.104 maka hela iha sentru ativu 38 iha, hosi totál família hamutuk 8.548 ne’ebé afeta hosi inundasaun sira iha sidade Dili.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here