Kondisaun mota Comoro durante inundasaun iha kapitál Dili, domingu (04/04). Imajen TATOLI/António Gonçalves

DILI, 14 abril 2021 (TATOLI)—Governu liuhosi Ministériu Administrasaun Estatál (MAE), semana kotuk, fó orientasaun ba Administradór Postu Administrativu no Xefe Suku sira atu halo levantamentu dadus ba vítima afetadu dezastre naturál hodi submete ba Ministériu Administrasaun Estatál.

Administradór Postu Administrativu Nain Feto, Tomás Alberto Brás, informa daudaun ne’e nia parte submete uluk ona dadus vítima afetadu ba inundasaun hamutuk uma-kain ualu (8) ne’ebé sira-nia uma estraga totál ba Prizedente Autoridade Munisípiu (PAM) Dili no submete ona ba Ministériu Administrasaun Estatál (MAE).

“Horisehik ha’u entrega ona dadus família afetadu inundasaun hamutuk uma kain ualu (8) ba PAM no submete ona Ministériu Administrasaun Estatál atu Governu bele fó apoiu ba vítima sira-ne’e,” Tomás Alberto Brás infroma ba Ajénsia TATOLI, liuhosi telefónika, kuarta ne’e.

Administradór Postu Administrativu Nain Feto,Tomás Alberto Brás.

Administradór ne’e hatutan, vítima afetadu ba inundasaun hosi uma kain ualu (8) ne’e foti hosi Suku Acadiru Hun nian de’it no suku lima (5) seluk ho total xefe família 1.541 ne’e mak seidauk identifika loloos, família hira mak afeta ba dezastre naturál no sasán sira hetan estragu.

“Ha’u sempre fó hanoin ba xefe aldeia no xefe suku sira atu aselera lalais ita-nia atividade rekolla dadus ba komunidade afetadu sira, nune’e vítima sira bele hetan apoiu ruma hosi Governu,” nia dehan.

Nia hateten, maske levantamentu dadus ne’e hala’o ona iha loron tolu (3) nia laran maibé autoridade komunitária sira seidauk bele finaliza tanba distánsia hosi aldeia ida ba aldeia seluk ne’e dala ruma dook tebes.

Administradór ne’e informa, suku neen (6) ne’ebé pretense ba Psotu Administrativu Nai Feto nian kompostu hosi suku Acadiru Hun iha total uma-kain 787, Bidau Lecidere 265, Bemori 18, Gricenfor 74, Santa Cruz 201, no Lahane Orientál uma kain 196 ne’e seidauk entrega tanba sei prenxe hela formuláriu no sei husu ba uma na’in sasán saida mak hetan estragus iha uma-laran ne’e presiza identifika.

“Bainhira xefe aldeia no xefe suku sira rekolla hotu dadus no hatama ona mai mak hafoin ha’u sei submete ba Prezidente Autoridade Munisípiu Dili mak hafoin entrega ba Ministériu Administrasaun Estatál,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here