Estudante eskola Ensino Basico Esperança da Pátria, Becora, Dili. Imajen Tatoli/Egas Cristóvão.

DILI, 13 abríl 2021 (TATOLI)—Maski Munisípiu Dili sei iha hela periúdu serka sanitária, maibé Serbisu Edukasaun Munisípiu Dili (SEMD), orienta ona Gabinete Diretiva Ensino Basico no Ensino Secundario-sira atu prepara rezumu matéria ezame primeiru periúdu ba estudante-sira.

“Ha’u orienta ona Gabinete Diretiva Ensino Basico no Ensino Secundario-sira atu bele orienta profesór-sira hodi halo preparasaun ba matéria ezame periúdu dahulu-nian,” Diretór SEMD, Duarte Bragança hateten ba jornalsita-sira iha serbisu fatin Comoro, tersa ne’e.

Notísia relevante:MEJD adia ezame periúdu dahuluk

Duarte Bragança husu ba Gabinete Diretiva Ensino Basico no Ensino Secundario-sira atu kontrola  nafatin serbisu preparasaun ba matéria ne’e to’o remata.

“Kuandu finaliza ona rezumu matéria sira ne’e, bele tau iha eskola atu estudante-sira bele mai foti hodi estuda, ba substituisaun aula normál,” nia subliña.

Tuir planu, SEMD sei haree kalendáriu atu realiza enkontru ho dirijente eskola-sira iha Munisípiu ne’e, nune’e bele rona diretamente informasaun hosi parte eskola-sira.

MEJD mós deside ona  kalendáriu ezame periúdu dahuluk, ba estudante Ensino Basico (EB) to’o Ensino Secundario Geral (ESG) no Ensino Secundario Tecnico Vocacional (ESTV), iha loron 19-24 abríl 2021.

Dadus ne’ebé MEJD iha, totál estudante hosi Ensino Basico (EB) to’o Ensino Secundario Geral (ESG) no Ensino Secundario Tecnico Vocacional (ESTV) hamutuk 73.166.

Hosi númeru ne’e, estudante na’in 30.369 mak sei tuir ezame periúdu dahuluk, mai hosi Munisípiu ualu hanesan, Manatuto, Manufahi, Ainaro, Aileu, Ermera, Bobonaro, Liquiça no Rejiaun Administrativa Espesiál Oe-cusse Ambeno (RAEOA).

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here