Ilustrasaun COVID-19. Imajen/Espesial

DILI, 13 abríl 2021 (TATOLI)—Koordenadora Jerál Komisaun Ezekutiva Saúde ba Surtu COVID-19 atuál Diretora Jerál Prestasaun Servisu Ministériu Saúde, Odete da Silva Viegas, informa ba Kay Rala Xanana Gusmão no família matebian katak mate-isin Armindo Borges konserva ona iha konjeladór hodi hein desizaun hosi Governu.

Notísia Relevante: La entrega mate-isin, Xanana deside toba iha sentru izolamentu

“Laiha problema ida ke laiha solusaun, ita sei liuhosi prosesu. Solusaun ba agora daudaun maka mate-isin ita tenke tau tiha ba konjeladór. Konjeladór sei lori mai agora hodi konserva mate-isin. Kona-ba haloot, seidauk iha desizaun,” Odete da Silva Viegas ko’alia asuntu ne’e bainhira halo aprosimasaun ho família matebian iha Sentru Izolamentu Vera Cruz, tersa ne’e.

Nia dehan, mate-isin labele husik de’it hanesan ne’e, maibé normalmente tenke sona mate-isin hafoin halo konservasaun.

“Komu agora seidauk ba hakoi, entaun ami tenke buka jeleira atubele konserva fali mate-isin. Imi (família) mós labele triste demais. Ha’u labele fó desizaun bainhira mak hakoi. Ita hein de’it solusaun sei mosu mai,” nia informa ba família matebian.

Diretóra Jerál MS ne’e mós fó hanoin ba família matebian katak, meiu hotu-hotu parte saúde esforsu hela. Tanba ne’e, nia husu ba família atu deskansa tanba la deskansa ne’e moras COVID-19 bele hada’et ho fásil.

Odete da Silva Viegas fó-sai katak, ema lafiar COVID-19 maibé virus ne’e eziste no idak-idak mak tenke prevene-aan.

“Virus ne’e, ita la deskansa, nia bele dezenvolve lalais. Virus ne’e kona tanba ita hanoin barak, ita haan ladún di’ak no ita toba ladún di’ak, ita bele moras lalais,” nia dehan.

Tuir observasaun Agência TATOLI iha terrenu nota katak, konjeladór to’o ona iha sala Izolamentu Vera Cruz hodi konserva fila-fali mate-isin, hodi hein desizaun ikus hosi Governu.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here