Kondisaun Mota Comoro, durante inundasaun iha Dili, segunda (12/04/2021). Imajen TATOLI/António Gonçalves

DILI, 12 abríl 2021 (TATOLI)-Governu Austrália hatudu kompromisu atu apoia Timor-Leste ho osan millaun AU$7 hodi finansia impaktu inundasaun iha domingu (12/04), ne’ebé akontese iha munisípiu tomak, liu-liu munisípiu Dili ne’ebé hetan impaktu boot liu.

“Hodi responde pedidu asisténsia hosi Governu Timor-Leste, ami apoia emerjénsia hamutuk millaun AU$7, sei destina ba povu ne’ebé mak afetadu bee-sa’e ho estimasaun ema maizumenus 100.000 no hodi responde ba nesesidade seguransa ai-han ne’ebé krítiku,” refere nota ne’ebé Agência TATOLI asesu, segunda ne’e.

Nota ne’e informa, daudaun ne’e Governu Austrália hala’o serbisu parseria ho belun no viziñu ne’ebé besik liu Timor-Leste hodi apoia rekupera hosi kalamidade.

Asisténsia ne’e nu’udar adisaun ba Austrália, hodi fó asisténsia imediata ne’ebé fornese ona iha Dili, ba ema rihun ne’ebé mak hela iha sentru evakuasaun sira , iuhosi dalan hadi’a fali sistema eletrisidade ba Sala Situasaun-Sentu Integradu Jestaun Krize (CIGC, sigla portugés), sentru tratamentu COVID-19, fatin halo pasa revista sira, no polísia nia fasilidade sira.

Austrália nia asisténsia adisionál ne’e, ba tulun emerjénsia ne’ebé sei inklui hanesan  provizaun imidiata ba ekipamentu protetivu pesoál, ho aumenta no truka ba stock iha Timor-Leste, ne’ebé menus ona tanba afetadu hosi bee-sa’e.

Nune’e, materiál asisténsia emerjénsia hanesan hela-fatin temporária no sasán esensiál ba uma-kain hodi troka fali sasán hirak ne’ebé mak lakon tanba dezastre naturál.

Aleinde ne’e, asisténsia finanseiru ba Cruz Vermelha de Timor-Leste (CVTL) no Cruz Vermelha Austrália inklui organizasaun naun-governmentál lokál sira ne’ebé mak fornese tulun ba esforsu asisténsia liuhosi World Food Programme (WFP) hodi hatan ba distribuisaun ai-han ne’ebé mak menus.

Austrália mós serbisu hamutuk ho Governu Timor-Leste hodi responde ba Timor-Leste nia nesesidade ba vasina COVID-19.

“Ida-ne’e hola parte ba ami-nia inisiativa vasina ho kustu millaun $623,2 ba Sudeste-Áziatiku, Rejiaun Pasífiku no aumenta ba ami-nia kontribuisaun millaun $80 ba Fasilidade COVAX Facility Advance Market Commitment multilaterál ba nasaun dezenvolvidu sira,” subliña nota ne’e.

Pakote asisténsia ne’e harii tuir relasaun serbisu ne’ebé mak daudaun la’o hela hosi programa dezenvolvimentu hadi’ak asesu ba bee-moos, asegura feto iha asesu ba uma-fatin ne’ebé seguru no fornese asesu ba serbisu akonsellamentu no apoia psikososiál.

Austrália hamriik firme  hodi fornese asisténsia liután inklui liuhosi espesialista saúde públiku AUSMAT hodi tulun ba jestaun vasina COVID-19.

Jornalista: Florencio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here