Sasán nesesidade bázika ne'ebé CVTL Liquiça oferese ba família afetadu iha Tibar, domingu (11/04/21). Imajen Tatoli/Hortencio Sanchez.

LIQUIÇA, 11 abríl 2021 (TATOLI)—Cruz Vermelha Timor–Leste (CVTL) filiál Munisípiu Liquiça, oferese apoiu umanitáriu, liuliu nesesidade bázika ba vítima inundasaun iha Suku Tibar, Postu Admnistrativu Bazartete.

“Ita tulun vítima-sira tanba sira-nia sasan inundasaun estraga totál. Sasan ne’ebé ita fó tuir kbiit ne’ebé CVTL iha, hodi bele rekopera oitoan hosi sira-nia terus tanba ita haree vítima-sira ho kondisaun grave,” Koordenadór  CVTL filiál Liquiça, César da Silva Bruno, hateten ba jornalista Agéncia Tatoli, iha Tibar domingu ne’e.

Notísia relevante:MSSI Liquiça halo levantamentu dadus ba vítima dezastre naturál

Nesesidade bázika ne’ebé CVTL filiál Liquiça oferese bazeia ba uma-kain no la haree ba pesoál tanba ne’e família ida hetan pakote ida ho sasan kompletu.

Sasan ne’ebé CVTL prepara mak hanesan biti, sanan, kanuru, bikan, balde, sabaun no seluk tan.

Sasan hirak-ne’e CVTL fahe tanba serbisu hamutuk ho Governu liu-liu Ministériu Solidariedade Sosiál no Inkluzaun (MSSI), Sekretáriu Estadu Protesaun Sivíl (SEPS) no seluk tan.

Entretantu, dadus ne’ebé CVTL filiál Liquiça hetan, inundasaun ne’ebé akontese iha 04 abríl estraga totál uma hamutuk 67 iha Suku Tibar.

Jornalista: Hortencio Sanchez

Editór: Cipriano Colo

HAKEREK NO HATÁN

Please enter your comment!
Please enter your name here