Kondisaun estrada Beduku hafoin inundasaun iha domingu (04/04). Imajen TATOLI/António Gonçalves.

DILI, 10 abríl 2021 (TATOLI)—Primeiru-Ministru (PM), Taur Matan Ruak konsidera laiha konseitu, dezeñu fó impaktu boot ba kualidade obra sira, nune’e sai problema boot ba Timor-Leste.

Preokupasaun ne’e mosu hafoin Xefe Governu ne’e hala’o observasaun hikas ba estragu sira hosi dezastre naturál ne’ebé akontese iha domingu (04/04) liubá.

Tanba ne’e, Primeiru-Ministru, Taur Matan Ruak fó orientasaun ba Ministériu Planu Ordenamentu (MPO) no Ministériu Obra Públika (MOP) hahú haree ona kestaun ne’e, nune’e iha futuru labele lori risku ba Timor-Leste.

“Karik tékniku timor-oan seidauk bele, presiza apoiu tékniku internasionál nian. Ezemplu, hosi Japaun ka Austrália atubele ajuda tékniku timor-oan iha MOP no ADN hodi halo konseitu ida ne’ebé di’ak, redezeña barrajen sira ba mota sira liuliu iha Dili laran, nune’e projetu iha futuru mai bele dura ba tempu naruk. Labele kada tinan udan tun, barrajen mota korrente bee lori tutuir ba tasi,” PM Taur hateten liuhosi nota imprensa ne’ebé Agência Tatoli asesu, sábadu ne’e.

Xefe Ezekutivu ne’e akresenta, kuandu la halo mudansa agora no sé kontinua de’it ho buat sira ne’ebé iha daudaun ne’e, Governu ne’ebé mak sei tuir mai sei kontinua ulun-moras ba asuntu ne’ebé Governu atuál daudaun hasoru.

Eis Prezidente Repúblika ne’e husu ba tékniku MOP no ADN atu dezeña oinsá bele dezvia tiha mota hosi Manleuana nian ba sai iha mota Comoro, tanba bainhira udan ho intensidade boot, sempre lori risku ba komunidade iha Manleuana inklui sira iha Bairru Píte, Hudi Laran, Ai-Mutin no Palásiu Prezidente nian.

“Tanba volume bee boot, la akumuladu hodi nakfakar sai tuir estrada no tama ba komunidade sira -nia uma,” Taur Matan Ruak afirma.

PM Taur sente hakfodak, tanba Mota Manleuana iha ulun ne’ebá luan, maibé tun mai kra’ik, kompañia sira halo drainazen halo kloot tiha fali, nune’e bainhira udan  makaas labele akumula  udan-been no tenke fakar sai  tuir estrada hodi ba estraga populasaun sira-nia hela fatin.

Entretantu Ministru Obra Públika, Salvador Eugênio dos Reis Soares Pires, hateten kona-ba Mota Manleuana nian, iha ona dezeñu ne’ebé apoiu  hosi  fundu MCC nian atubele dezvia ba Mota Comoro, se buat hotu la’o di’ak tinan ne’e (2021) bele ona hahú implementa.

Notísia Relevante:  MOP-ADN hahú indika empreza normaliza estrada iha Embaixada Japaun oin

Jornalista: Antónia Gusmão

Editór: Cancio Ximenes

HAKEREK NO HATÁN

Please enter your comment!
Please enter your name here