Xefe Estadu Maiór Jenerál (F-FDTL),Tenente Jenerál Lere Anan Timur, hamutuk ho Vise Ministru Interiór (MI), António Armindo, no Sekretáriu Estadu Protesaun Sivíl (SEPS), Joaquim Gusmão dada lia hela bainhira observa bee ne’ebé nalihun iha Lagoa Tasi Tolu, sábadu (10/04). Imajen/Mídia F-FDTL.

DILI, 10 abríl 2021 (TATOLI)—Komandu FALINTIL-Forsa Defeza Timor-Leste (F-FDTL) apoiu bero ki’ik rua hodi fasilita no halo atendimentu transportasaun ba abitante sira-ne’ebé hela iha bairru Maslidun no hela besik Lagoa Tasi-Tolu bele ba-mai uma.

Notísia Relevante: F-FDTL monta kuzina movel iha Tasi Tolu

“Ohin ne’e kedas bero ki’ik rua ita lori mai hodi bele ajuda komunidade bele halo movimentu asesu bee, hahán, bee-mos, no evakua moras hodi bele halo tratamentu,’’ Xefe Estadu Maiór Jenerál (F-FDTL), Tenente Jenerál Lere Anan Timur, hateten ba jornalista sira iha Tasi-Tolu, Dili, sábadu ne’e.

Aleinde ne’e, Tenente Jenerál Lere Anan Timur hatutan, liuhosi kooperasaun ho forsa militár Austrália dadaun ne’e halo hela observasaun no estudu tekníku, bainhira viável sei mobiliza ekipamente hodi supa sai bee iha Lagoa Tasi-Tolu ne’e.

“Ida ne’e parte tekníku mak hatene tuir sikulu ne’ebé iha,” Lere Anan Timur hateten.

Iha fatin hanesan, Sekretáriu Estadu Protesaun Sivíl (SEPS), Joaquim Gusmão, hateten hafoin akontese inundasaun foin lalais ne’e parte Bombeiru fasilita bero ki’ik ida atende komunidade sira liuliu fasilita ema moras, inan isin-rua, labarik, ferik ho katuas, ema ho defisiénsia ne’ebé presiza halo tratamentu médiku.

“Maibé bero ne’e halo operasaun iha asidente. Daudaun ne’e halo hela manutensaun. Orsida bele lori fali mai,” Joaquim Gusmão hateten.

Abitante sira sa’e bero ki’ik ba-mai iha Lagoa Tasi Tolu. Imajen Tatoli/Nelson de Sousa.

Entretantu, peskadór ne’ebé oferese nia bero ki’ik hosi fasilita komunidade iha Lagoa Tasi-Tolu, Julio da Costa, hateten sira-nia parte halo atendimentu tula komunidade sira ba mai-uma hosi dadeer to’o fali ba lorokraik, ho kapasidade bero bele tula ema na’in-tolu (3) ka haat (4) inklui sasán balun depende ba kapasidade bero nian.

“Kada ema ida selu $1. Karik sasán hanesan motor entaun selu $5,” nia dehan.

Tuir observasaun Agência Tatoli iha terrenu nota katak bero ki’ik hosi peskadór sira-nian kuaze ualu (8) mak halo operasaun iha Lagua Tasi-Tolu hodi tula abitante sira ba-mai.

Dezastre naturál ne’ebé akotese hanesan udan-anin no rai-halai, sábadu-domingu (03-04/04) liubá, lori taterus ba abitante sira kuaze iha Dili laran no munisípiu sira balun, inklui mós komunidade lubun iha Lagoa Tasi-Tolu ne’ebé sofre makaas hosi inundasaun ne’e.

Udan ho intensiade bo’ot no ho durasaun kleur ne’ebé akontese iha semana kotuk, halo Lagoa Tasi-Tolu sai bee-lihun boot ida (sai ida-de’it), nune’e bee nalihun ne’e to’o oras-ne’e seidauk maran no laiha dalan ba komunidade iha área refere halo movimentu ba-mai, entaun ho bero ki’ik de’it mak bele fasilita sira.

Jornalista: Nelson de Sousa

Editór: Cancio Ximenes

HAKEREK NO HATÁN

Please enter your comment!
Please enter your name here