Tékniku BTL.EP normaliza hikas sistema bee bomba subteranu Mascareñas, ne’ebé distribuisaun bee la’o normál ona iha area Quintal boot-kiik, St. Cruz, Bemori, no Mascareñas, kinta (08/04). Imajen/BTL

DILI, 10 abríl 2021 (TATOLI)–Bee Timor-Leste, Empreza Públika (BTL,E.P) garante aban (11/04) fornese hikas bee-moos ba komunidade Bekusi, Suku Becora, Postu Administrativu Cristo Rei, Munisípiu Dili.
Ministru Obra Públika (MOP), Salvador Eugênio Soares dos Reis Pires, hato’o promesa ne’e bainhira akompaña Prezidente Konsellu Administrasaun BTL,E.P, Carlos Peloi dos Reis, Diretór Nasionál Servisu Água (DNSA), Eduardo Dias Ximenes, no tékniku sira iha sábadu loraik ne’e.

“Nota katak hafoin dezastre naturál iha loron 04 fulan-abrí 2021, kanalizasaun sira hetan hotu estragu. Tan ne’e, husu komunidade atu pasiénsia tanba daudaun ne’e ekipa tékniku BTL halo ona manutensaun ba kanalizasaun sira hodi fornese hikas bee-moos ba komunidade,” Ministru Obra Públika relata liuhosi nota imprensa ne’ebé Agência Tatoli asesu, sábadu ne’e.

Enkuantu, tanke iha Bekusi no Aitahan Belar ne’ebé durante ne’e fornese bee-moos ba komunidade Bekusi, dadaun ne’e sei ense hela bee-moos, no iha loron 11 fulan-Abril 2021 sei fornese bee-moos ba komunidade iha Bekusi liuhosi komunidade ne’ebé asesu ba kanalizasaun bee-moos hosi tanke Bekusi no Aitahan Belar nian.

Jornalista: Antónia Gusmão

Editór: Cancio Ximenes

HAKEREK NO HATÁN

Please enter your comment!
Please enter your name here