DILI, 09 abríl 2021 (TATOLI)Primeiru-Ministru (PM), Taur Matan Ruak, iha inisiativa atu husu tulun ba Governu Japaun fó apoiu enjeñeiru Japaun hodi redezeña barrajen ba mota sira.

Inisiativa ne’e mosu hafoin Xefe Governu hanutuk ho membru Governu tutela ba área infraestrutura no entidade relevante sira halo observasaun ba barrajen sira ne’ebé sustenta mota boot sira iha territóriu laran.

“Barrajen sira ne’ebé sustenta mota sira kuaze  laiha kualidade, hanesan ema karik ruin la iha, ne’ebé kada tinan bainhira udan boot tun, korrente mota soke kois barrajen hirak ne’e kuaze monu hotu hodi ba para iha tasi,” PM Taur dehan, hanesan haktuir iha nota ne’ebé Agência TATOLI asesu, iha sesta ne’e.

Ho akontesimentu ne’e, Xefe Ezekutivu konsidera iha nesidade husu tulun Japaun nia enjeñeiru kualidade, nune’e bele ajuda dezeña filafali barrajen mota sira iha territóriu laran atu evita situasaun sira akontese filafila hodi Governu gasta de’it osan ba barrajen.

“Mota sira iha Timor-Leste, bainhira udan boot,  korrente bee maka’as tebes tanba ne’e la serve barrajen sira ne’ebé hada de’it ho fatuk, tanba sei laiha kbiit atu satan korrente mota hanesan akontese daudaun ne’e,” PM Taur tenik.

Iha biban ne’e, nia husu ba Vise Primeiru-Ministru no Ministru Planu no Ordenamentu, José Maria dos Reis, atu hamosu lalais lei penalizasaun ba kompañia sira ne’ebé kaer projetu laiha kualidade.

“Nune’e, bele responsabiliza tantu administrativa no kriminál, tanba durante ne’e laiha lei ida mak regula, nune’e kompañia sira halimar ho Estadu  hodi halo obra tuir hakarak,” PM lamenta.

Biban ne’e, xefe Governu orienta, bainhira iha projetu sira oin mai, tenke ativa jestór projetu hodi halo bebeik monitorizasaun ba projetu sira durante implementasaun, nune’e bele evita kompañia sira halo manipulasaun iha terrenu.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here