Ministru Koordenadór Asuntu Ekonómiku, Joaquim Amaral. Imajen Tatoli/Egas Cristovão

DILI, 09 abríl 2021 (TATOLI)—VIII Governu Konstitusionál propoin millaun $30 liuhosi proposta-alterasaun ba Lei Orsamentu Jerál Estadu (OJE) 2021 hodi finaliza programa Cesta Bázika iha territóriu nasionál.

Notísia Relevante: Aprovizionamentu akizisaun produtu Cesta Bázika uza modalidade adjudikasaun direta

“Governu husu tán millaun $30 tau ba iha Cesta Bázika to’o finaliza pagamentu. Ne’ebé, osan ne’e to’o ona, atubele selu hotu distribuisaun ne’ebé mak iha. Ne’e ministériu hotu-hotu liuhosi rezolusaun Governu nian kontribui 7% no MKAE mós kontribui 7%,” Ministru Koordenadór Asuntu Ekonómiku (MKAE), Joaquim Amaral, infoma ba jornalista sira, iha Parlamentu Nasionál, sesta ne’e.

Nia dehan, aumenta iha orsamentu retifikativu ne’e tanba osan ne’ebé halibur hosi 7% kada ministériu seidauk kompleta.

“Tan ne’e mai ita aproveita retifikativu ita tau kedas ne’e garante katak osan iha tiha ona no pagamentu prontu kuandu sira halo distribuisaun hotu ona,” nia dehan.

Nia hateten, totál orsamentu ba programa cesta bázika antes ne’e hamutuk millaun $71-resin ba iha implementasaun cesta bázika, maibé orsamentu ne’e la sufisiente tan ne’e mak propoin tán millaun $30 liuhosi alterasaun OJE 2021.

Ministru Joaquim fó-sai katak, orsamentu millaun $71-resin ne’e benefísia ona benefisiáriu millaun 1,3 maibé Ministériu Administrasaun Estatál (MAE) halo fali levantamentu hodi rekonfirma dadus totál benefisiáriu sa’e ba millaun 1,5.

“Ha’u fiar katak númeru benefisiáriu sei lato’o (millaun 1,5) ne’e tanba iha duplikat lubuk ida, balun eskola iha Dili maibé simu mós iha munisípiu,” nia dehan.

Nia haktuir, benefisiáriu millaun 1,3 no atinje ona 79% no fulan-rua ikus ne’e atividade distribuisaun la la’o tanba aplikasaun serka sanitária no konfinamentu domisiliária jerál.

“Ohin, iha Dili, Becora hahú fali distribuisaun cesta bázika. Ho distribuisaun ne’e bele hakmaan komunidade sira iha situasaun emerjénsia ne’e,” nia hateten.

Ministru ne’e hateten, munisípiu sira liuliu sira-ne’ebe seidauk hetan direitu tanba kondisaun estrada seidauk di’ak.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here