Kondisaun ponte asesu entre edifísiu Fundasaun Ahisaun, Fatuhada, ho estrada, iha kinta (08/04). Imajen TATOLI/Natalino Costa

DILI, 08 abríl 2021 (TATOLI)Ponte ligasaun edifísiu Fundasaun Ahisaun Fatuhada ba estrada tohar hafoin inundasaun ne’ebé akontese iha domingu (04/04), halo maluk sira ho difisiénsia daudaun ne’e labele halo movimentu.

Tuir Fundadór Fundasaun Ahisaun, Padre Adri Ola Doli, impaktu hosi udan boot foin daudaun halo ponte monu.

“Sira iha ne’e iha na’in-24, ita haree iha uma oin ne’e ponte monu, entaun sira labele asesu ba li’ur. Ita la hatene to’o bainhira,” Fundadór Fundasaun informa ba Agência TATOLI, iha edifísiu Fatuhada, kinta ne’e.

Fundadór Fundasaun Ahisaun, Padre Adri Ola Doli. Imajen TATOLI/Natalino Costa

Nia haktuir, ponte ne’e maka durante ne’e fasilita maluk difisiente sira bá-mai.

“Ponte ne’e sira uluk harii ho fundasi metru 20 de’it, tanba ne’e kuandu bee boot mai automátikamente ponte monu,” nia akresenta.

Maski nune’e, parte fundasaun seidauk konsege kontaktu Ministériu Obra Públika (MOP) atu hadi’a fali ponte ne’e.

Ema ho difisiénsia sira iha Fundasaun Ahisaun, Fatuhada, kinta (08/04). Imajen TATOLI/Natalino Costa

Alende ne’e, durante bee sa’e konsege estraga stock foos ne’ebé iha fundasaun.

“Foin daudaun Sekretaria Estadu Komunikasaun Sosiál (SEKOMS) mai apoia foos no nesesidade seluk,” nia hatutan.

Maski bee sa’e maka’as maibé ema ho difisiénsia ne’ebé hela iha fundasaun ho kondisaun di’ak hotu maibé fikuldade agora mak asesu ba li’ur.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here