Komunidade saleziana no Colégio de Santo Inácio de Loiola, reza ba mate-isin Alcino Cristóvão Kefi, molok lori ba Baucau, iha Kapela Centek, Don Bosco, Comoro, kinta (09/04). Imajen/Domingos Piedade Freitas

DILI, 08 marsu 2021 (TATOLI)–Diretór Institutu Filófiku São Francisco de Sales (IFFS), Padre Manuel Pinto, hamutuk ho antigu alunu Don Bosco no Colégio de Santo Inácio de Loiola despede matebian Alcino Cristóvão Kefi, molok lori hikas ba Lavateri, Baucau.

Profesor Alcino Cristóvão nu’udar antigu alunu salesianu foinsa’e no sai mos hanesan profesor iha eskola Jesuita iha Ulmera no Colégio de Santo Inâcio de Loiola.

Iha loron 04 abríl, Profesor Alcino Cristóvão Kefi hamutuk ho nia alin Fredolino Kefi, sai vítima ba udan boot no inundasaun no hakotu sira nia jornada moris iha mundu. 

“Ha’u lori komunidade Saleziana ho Institutu Filósofiku São Francisco de Sales nia naran, hakarak hato’o laran susar no sentidu kondolénsia profundu ba família matebian, liuliu ba ninia mama no alin sira,” Padre Manuel Pinto, hateten hafoin ramata venerasaun ikus ba matebian ninia mate-isin, iha kapela Centek, Don Bosco Comoro, Dili, kinta ne’e.

Komunidade salesiana sira kontinua reza no halo mosa ba matebian ninia klamar, nune’e mós ho ninia alin matebian Fredolino Kefi ne’ebé mak husik hela mundu iha loron hirak liubá.

“Ami husu ba ninia mama no tiu katak molok matebian nia mate-isin liu bá Baucau, ami komunidade salesiana husu atu liuhosi Don Bosco Comoro, tamba matebian rasik ninia prosesu apredizajen no prosesu formasaun integrál, dezde kedas iha salesianu sira-nia liman,” nia tenik.

Tuir padre, durante tinan-tolu hamutuk ho nia iha Casa Post Noviciado Comoro, haree katak matebian hanesan labarik ne’ebé mak ativu, badinas, prontu atu tulun ema seluk iha dapur, oratório no estudu, nunka hirus, ko’alia barak no sempre haksolok nafatin.

Iha fatin hanesan, Thomas Joakino da Costa, sente triste tebes tanba lakon kolega profesor di’ak iha Colégio de Santo Inácio de Loiola.

“Nia ema ida ne’ebé hamnasa midar, oin la hatene hirus no nakonu ho naroman, moris nakonu ho simplisidade no sempre ativu iha saida de’it. Tanba ne’e, ami família Colégio de Santo Inácio de Loiola sente duni ninia santidade ne’e,” nia katak.

Reprezentante família, Sabino Perreira, agradese ba ninia maluk sira hotu, tantu hosi família salesiana rasik no mós Colégio de Santo Inacio de Loiola ne’ebé mak durante akompaña no hein nia mate-isin iha mortuáriu Hospital Nacional Guido Valadares (HNGV).

“Família hela dook hosi matebian ho tan situasaun serka sanitária halo movimentu susar ouituan, maski nune’e kolega sira ne’ebé mak hela iha Dili sempre akompaña to’o ohin loron,” nia haktuir.

Biografia

Profesor , Alcino Cristóvão  Kefi, moris iha loron 08 dezembru 1994, oan hosi Domingos Kefi (matebian) no Ana Celestina Pereira (faluk) no hanesan oan dahuluk hosi maun-alin na’in sia.

Profesor Alcino koñesidu ho karater hamnasadór, komunikativa, pasiénsia no pontuál.

Matebian hahú estudu iha ensinu primária escola São João de Brito Lavateri,  pre–sekundária públika Lavateri no ensinu sekundáriu iha eskola tékniku vokasionál Fuiloru, Lospalos. 

Hafoin termina nia ensinu sekundáriu, Profesor Alcino hili dalan formasaun ba aspirante durante tinan-ida ho komunidade salesiana  iha Foiloru, pre-novisiu iha Lospalos no kontinua nia formasaun espirituál iha Colégio Fatumaka durante tinan-ida.

Hafoin ida-ne´e, matebian kontinua nia estudu ba pos-novisiadu iha pos-novisiadu Beato Artémide Zatti Comoro.

Profesor Alcino hili dalan atu serbisu hodi kontribui ba nia família, nune´e matebian hahú serbisu iha Colégio de Santo Inâcio de Loiola, hahú janeiru 2021.

Iha Colégio, matebian serbisu hanesan profesor ne´ebé hanorin disiplina religiaun ba 8o no 12o ano, sidadania dezenvolvimentu sosiál ba 11o ano no asume pasta hanesan profesor asistente ba estudante 9o ano turma A.

Jornalista: Domingos Piedade Freitas

Editora: Julia Chatarina

HAKEREK NO HATÁN

Please enter your comment!
Please enter your name here