Militár sira iha selebrasaun transformasaun FALINTIL ba FALINTIL-FDTL ba dala 18 iha Kuartel Jerál F-FDTL, Fatuhada. Imajen TATOLI/António Gonçalves

DILI, 08 abríl 2021 (TATOLI)—Reuniaun Konsellu Ministru (KM) aprova ona ho alterasaun Projetu Rezolusaun Governu kona-ba efetivu annuál hodi inkorpora iha FALINTIL–Forsa Defeza Timor-Leste (F-FDTL) iha tinan 2021, ne’ebé aprezenta hosi Ministru Defeza, Filomeno da Paixão de Jesus.

“Aprovasaun ne’e ba realizasaun rekrutamentu militár ba inkorporasaun ba rekruta mane/feto hamutuk 600, ne’ebé na’in-240 sei ba komponente Forsa Navál Lijeira, na’in-240 ba  komponente Forsa Terestre no 120 ba unidade sira-seluk,” Ministru Prezidénsia KM, Fidelis Manuel Leite Magalhães relata hafoin ramata reuniaun ezekutivu iha Palásiu Governu, kinta ne’e.

Tuir Portavós Governu, rekrutamentu ne’e depende ba kondisaun COVID-19 iha Timor-Leste no kalamidade ne’ebé akontese.

Militár foun 600 atu kompleta númeru forsa F-FDTL ba 3.600, ne’ebé antes ne’e rekrutamentu pendente.

Iha Orsamentu Jerál Estadu (OJE) 2021, verba ba Ministériu Defeza inklui F-FDTL hamutuk millaun $45, enkuantu  ba F-FDTL rasik hamutuk millaun $25 inklui ona ho rekrutamentu forsa.

Jornalista: Antónia Gusmão

Editora: Julia Chatarina

1 KOMENTÁRIU

  1. Obrigado no parabens ba instituisan F-FDTL nb consegue Duni halo procesu recrutamento foun iha tinan 2021 hamutuk 600 personal. Bom trabalho, vigilancia maxima nudar lutu nasaun RDTL

HAKEREK NO HATÁN

Please enter your comment!
Please enter your name here